Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti.
Bu aqta Çubarov dekabrniñ 6-nda Kyivdeki matbuat konferentsiyasında bildirdi, dep haber ete Qırım.Aqiqat mühbiri.
Meclis reisiniñ aytqanına köre, Qırım işğalinden soñ «Rusiye, iç bir halqara qararnı yerine ketirmedi ve böyle aktsiya «onı uquq çerçivesine qaytarmağa yardım ete bile». Onıñ aytqanına köre, bu «halqara teşkilâtlarğa Rusiyege nisbeten alınğan qararlarnı yerine ketirmege yardım etecek».
«Qırımtatar Milliy Meclisi «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyasını keçirmek içün azırlıq körmege açıq teşebbüs köstere. Bu aktsiyanıñ şekli olaraq Ukraina devletiniñ esas qısmından Ukraina devletiniñ diger tarafı – Qırım yarımadasına doğru – yürüş teşkil etilüvini köremiz. Evimizge doğru ketemiz», – dedi Çubarov.
Meclis reisiniñ aytqanına köre, teşkilâtçılar bir sıra memleket ve halqara teşkilâtlarğa muracaat etip, yürüşte iştirak etmelerine davet etecek ola.
Çubarov, erkânı belli mesleatlardan soñ aydınlatılacaq ştab endi quruldı. Aktsiyanıñ künü ise daa soñra belli olacaq, çünki azırlıq «bir ya da eki aydan çoñ» devam ete bile.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
