Sentâbr 7-sinde Ukraina-Rusiye almaşuvında azat etilgen qırımtatar faali Edem Bekirov, Qırım.Aqiqatqa intervyü bergende, Rusiye akimiyetiniñ oña munasebeti aqqında aytıp berdi. O, onıñ davası ve Avropa İnsan aqları mahkemesiniñ qararı (mahkeme Bekirovnı hastahanege qoymağa üküm etti - QA), olar içün "tamaqtaki qılçıq" kibi edi, dep ayta.
"Bekirov olarda tamaqtaki qılçıq kibi edi. Ladin ve İslâmnen beraber (Aleksey Ladin ve İslâm Velillâyev – Edem Bekirovnıñ advokatları – QA). Olar: "Ne bizge siziñ mahkemeñiz, siziñ talaplarıñız. Bir şeyden işimiz yoq", deseler de. Aynı vaqıtta, men hastahanede olğanım aqqında esabat tapşırmaq kerek edi. Soñ meni Semaşkoğa (Semaşko adına Aqmescit hastahanesi - QA) alıp çıqa ediler, acele-acele. FSB hadimleri - ekimler - netice çıqara ediler. Olarnıñ neticelerine köre, men SİZOda eñ sağlam edim. Sportsmen, işte", – ikâye etti Bekirov.
O, öz noqta-i nazarını daima ifade etkenini ve qırımtatar halqınen beraber olğanını da aytıp qoştı.
"Men adiy adamım. Men qaraman degilim. Men sadece öz Vatanımnı sevem... Menim siyasiy noqta-i nazarım böyle: halqımnen ne olsa bile... Men artqa qaçmay edim. Men daima ög sıralarda edim. Bundan qorqmay edim. Menim fikrim: kimsege yaramaylıq tilemeyim, amma aynı vaqıtta, adalet olmaq kerek, dep tüşünem. Menim Vatanım azat olmaq kerek. Qayda olsam da, balalarım ve torunlarım qayda olsa da, olar, Qırım bar olğanını bilmeliler, o olarnıñ Vatanı olğanını bilmeliler. Ve olar istegen daqqada anda qaytıp, raat yaşap olacaqlarını bilmeliler. Vatan – budır...", – qoştı Bekirov.
Tünevin, sentâbr 10-unda, Edem Bekirovğa ameliyat yapıldı.
Sentâbrniñ 7-nde Ukraina ve Rusiye arasında tutulğanlarnı deñişim kerçekleştirildi. 35 ukrainalı ile uçaq «Borıspil» Kyiv ava limanında qondı. Deñişim çerçivesinde Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sızonovıç ve 2018 senesi noyabr ayında zapt etilgen ukrainalı deñizciler azat etildi.