Azat etilgen qırımtatar faali Edem Bekirovğa salı künü, sentâbrniñ 10-nda, ameliyat yapıldı. Bu aqta ombudsmen Lüdmila Denisova «Prâmıy» ukrain telekanalınıñ yayınında bildirdi.
«Bugün Bekirovğa ciddiy bir ameliyat yapıldı», – dep qayd etti Denisova.
Bekirovnıñ qızı Eleonoranıñ haber etkenine köre, ameliyat 5 saat devam etti, şimdi Bekirov reanimatsiyada buluna.
«SİZOda keçirgen 9 ayı izsiz olmadı. Tek sağlıq içün degil, maneviy alı içün de zarar oldı. Psiholog çalışacaq, oña maneviy ceetten özüne kelmege yardım eter, dep ümüt etem», – dep yazdı o, Facebookta.
Sentâbrniñ 7-nde Ukraina ve Rusiye arasında tutulğanlarnı deñişim kerçekleştirildi. 35 ukrainalı ile uçaq «Borıspil» Kyiv ava limanında qondı. Deñişim çerçivesinde Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sızonovıç ve 2018 senesi noyabr ayında zapt etilgen ukrainalı deñizciler azat etildi.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
