İlhaq etilgen Qırımda "E" merkeziniñ hadimleri 34 yaşındaki qırımtatar Rustem İbadlayevniñ evinde tintüv keçireler. Bunı "Qırım birdemligi" cemmat birleşmesi haber etti.
Tintüv İçki qasabasında keçirile. İbadlayevniñ evinde apayı ve üç balası yaşay.
Faallerniñ malümatına köre, quvetçiler tahqiqat tedbirlerniñ evniñ evelki saiplerine ait olğanını bildireler.
Qırımnıñ telükesizlik idareleriniñ matbuat hızmetleri İçki qasabasında keçirilgen tahqiqat tedbirler aqqında malümat bermeyler.
Dekabrniñ 17-nde saba Rusiye quvetçileri tarafından Eski Qırımda tintüv vaqtında tutulğan qırımtatarı Nariman Ametov Rusiye FSBsiniñ hadimleri tarafından elektrik aqımınen işkencege oğratıldı.
Hatırlatamız, dekabrniñ 17-nde saba Eski Qırımda Rusiye quvetçileri qırımtatarı Nariman Ametovnıñ evini tintti. O, tutuldı, onı belli olmağan yerge alıp kettiler. Narimannıñ ömür arqadaşı Elmaz Ametova, aqayı qırımtatar faalleri Nariman Celâl ve ağa-qardaş Ahtemovlar qabaatlanğan Anğara köyünde «gaz borusındaki diversiyağa» alâqası bar olğanından şübheli sayıla, dep bildirdi. Advokatlar bu malümatnı tasdıqlamay. Soñra faaller «Ametovnıñ bulunğan yeri belli degil», dep bildirdi.