Rusiyeniñ nezaretinde olğan Qırımnıñ Yuqarı Mahkemesiniñ qadısı Oleg Lebedev faal İlver Ametovnıñ davası üzre istinaf şikâyeti baqılğanda onıñ başlanğıç mahkemege qaytarılmasına qarar berdi. Bunı «Qırım esnası» haber etmekte.
«Oturış karantin sıñırlavları sebebinden içeri yiberilmegen diñleyicilerniñ iştirgi olmadan keçirildi. Mahkümniñ advokatı Aleksey Rostovtsevniñ aytıp bergenine köre, oturışı vaqtında, dava materiallarında başlanğıç mahkemeniñ mart ayı tarihlı oturışından protokollarnıñ biri ğayıp olğanı belli olğan. Bundan sebep, yuqarı mahkeme yetişmemezlikni yoq etmek içün davanı keri Sudaqqa yollamağa qarar alğan», – dep yazıla bildirmede.
Eger başlanğıç mahkemede coyulğan protokol tapılsa, Qırımnıñ Yuqarı mahkemesi istinaf şikâyetini baqmağa devam etecek. Eger de vesiqa tapılmasa, üküm lâğu etilecek, Ametovnıñ cinayet davası ise ğayrıdan baqılacaq.
Ukraina ombudsmanı Lüdmila Denisova Rusiye kontrolindeki Sudaq şeer mahkemesiniñ qırımtatar faali İlver Ametovğa qarşı çıqarğan ükmüni «Mecliste iştirak etkeni içün daa bir taqip örnegi», dep adlandırdı.
Hatırlatamız, avgustnıñ 5-nde Rusiye kontrolindeki Sudaq şeer mahkemesiniñ qadısı Yelena Bosi nariye silâsınıñ parçalarını qanunsız saqlağanında qabaatlanğan qırımtatar faali İlver Ametovnıñ cinaiy davası boyunca üküm çıqardı.
Avgustnıñ 4-nde munaqaşa vaqtında devlet qabaatlayıcısınıñ vekili mahkemeden Ametovnıñ azatlığını 10 ayğa sıñırlamasını istedi. İmaye faalni aqlamağa rica etti. Advokat Aleksey Rostovtsevniñ munaqaşalardan soñ bildirgenine köre, mahkeme qararı müvekkili içün menfiy olsa, o, istinaf şikâyetini berecek.
2019 senesi sentâbrniñ 27-nde Sudaqta Rusiye quvetçileri İlver Ametovnıñ evini tintti. Qırımtatar Milliy Meclisiniñ aza şeadetnamesi, müzey eşyaları, bazı vesiqalar «ekspertizağa» alındı.
Dava malümatına köre, «2019 senesi sentâbrniñ 27-nde evde keçirilgen qıdıruv tedbirleri vaqtında İlver Ametovdan alınğan silâ bir namlu, qısqa namlu, tegiz namlu, kesken, bir kereden toldurılğan, «Nagan» sistemasınıñ (1895 s.) yedi tolu nariye ekvivalenti ola. Bir qutulı, bir mehanizmli, 1891-1930 seneleri nariye silâsınıñ parçalarınen».
2021 senesi iyül ayında İlver Ametovnıñ qabaatlav hulâsasından nariye silâsını qanunsız aluvnen bağlı qısım çıqarıldı.
Qırım Muhtar Cumhuriyetiniñ prokuraturası İlver Ametovğa ait binalarda keçirilgen «qanunsız tintüvler» sebebinden cinaiy tahqiqat başlattı.
Bu sene mayıs ayında berilgen malümatqa köre, Kreml kontrolindeki Sudaqnıñ Mirovoy mahkemesi İlver Ametovğa 150 biñ ruble para cezasını bermege qarar aldı. Para cezası onıñ iş adamı olaraq köstergen faaliyetinen bağlıdır.
İlver Ametov – qırımtatar milliy areketiniñ faali, Sudaq regional meclisiniñ reisidir.