Ukraina prezidentiniñ ofisi qırımtatarlarnıñ milliy lideri, Ukraina Yuqarı Radasınıñ deputatı («Avropa birdemligi» fraktsiyası) Mustafa Cemilevniñ doğğan kününi tebrikledi. Noyabrniñ 13-nde o, 77 yaşını toldurdı.
«Siz – qırımtatar halqınıñ baş liderisiñiz. İlham ve qaviy sağlıq tileymiz! Qırım er vaqıt Ukraina olacaq, ve onı mıtlaqa beraber qaytaracaqmız», – dep aytıla Prezident ofisiniñ Facebook haberinde.
Ukraina prezidentiniñ Qırım Muhtar Cumhuriyetindeki temsilciligi Cemilevge sağlıq ve küç tiledi.
«Qırımnı işğalden qurtaruv ve Qırım yarımadasında yaşamaq ve inkişaf ettirmek imkânını qaytaruv işinde yardım etmege azırmız», – dep qayd etti müessise.
Ukraina Tış işler naziriniñ birinci muavini Emine Ceppar tez vaqıtta Vatanğa qaytmasını tiledi.
«Ayatı küreş ve yıqılmama ve zafer numayışı olğan efsane insan Mustafa Cemilevniñ doğğan künü! Bütün memleketniñ ürmetini qazanğan insanğa bunı tileyim – ğalebe ve Vatanğa qaytmasını!», – dep aytıla Facebooktaki haberinde.
Mustafa Cemilevni işğal altındaki Qırımdan da tebrikleyler.
Semetdeşlerniñ videolarını Nariman Celâl Facbook saifesinde derc etti.
Noyabrniñ 13-nde Mustafa Cemilev istegen er kesniñ tebriklerini qabul etmek içün online körüşüv ötkerecek.
Your browser doesn’t support HTML5
Ne içün Cemilev efsane ola (video)
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.