Qırımtatarlarnıñ milliy lideri, Ukraina Yuqarı Radasınıñ deputatı («Avropa birdemligi» fraktsiyası) Mustafa Cemilev öz doğğan kününde noyabrniñ 13-nde online körüşüv keçirmege niyetlene.
Cemilevniñ resmiy Facebook saifesinde berilgen malümatqa köre, böyle körüşüvni koronavirus pandemiyası şaraitlerinde 77 yaşını tebriklemek istegen er kes qoşulsın dep teşkil etmege qarar alındı.
«Mustafa ağanı şahsen tebriklemek istegen bir çoq insan onnen nasıl körüşeceklerini aytmamıznı istey. Ne yazıq ki, bu yıl, COVID-19 şaraitlerinde, şahsiy subet formatında dost körüşüvleri bile imkânsız körüne. Lâkin zemaneviy tehnologiyalar sayesinde Mustafa ağanen ZOOM-körüşüvini keçirmege planlaştıramız, vatandaş, qırımtatar milliy areketiniñ faalleri, qırımtatar diasporasınıñ vekilleri, farqlı memleketlerde yaşağan aq qorçalayıcılarnıñ online tebriklemeleri mümkün olacaq», – dep aytıla haberde.
Qayd etilgenine köre, ZOOM-körüşüvi noyabrniñ 13-nde Kyiv saatınen 14:00-da başlanacaq. Körüşüvge qoşulmaq içün evelden qayd olmaq kerek.
Noyabrniñ 13-nde Mustafa Cemilev 77 yaşını tolduracaq. Soñki altı yıldan berli o, Qırımğa kirip olamay. Qırım işğalinden soñ Rusiye yarımadağa kirişini yasaqladı. Yasaq 2019 senesi aprelniñ 19-nda bitti, lâkin Cemilev kene de Qırımğa qaytıp olamay.
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
