Advokat Edem Semedlâyev dekabrniñ 16-nda cemaat imayecisi ve faal Mustafa Seydaliyev ile körüşti. Bunı «Qırım birdemligi» cemaat birleşmesi haber etmekte.
«Advokatnıñ sözlerine köre, Seydaliyev yahşıdır, oña muntazam şçekilde yollanmalar berile eken», – dep haber etile.
Dekabrniñ 17-nde, cuma künü, Seydaliyev 10 künlük memuriy tevqiften soñ azat etilecek.
Rusiyeniñ nezaretinde olğan Qırımnıñ Kirovsk rayon mahkemesi «Qırım birdemligi»niñ koordinatorı ve cemaat imayecisi Mustafa Seydaliyevni 10 künge tevqif etti. Sebep «ekstremit materiallarnıñ yazılması ve yayınlaması» oldı.
Evel, dekabrniñ 7-nde memuriy apis cezası bitken soñ Kezlev polis bölüginden yiberilmedi.
Aqmescitte noyabrniñ 23-nde aqşam Rusiye quvetçileri azatlıqqa çıqqan Edem Semedlâyevni qarşılamaq içün vaqtınca tutuv izolâtorınıñ binasına kelgen faallerni tuttı. 31 insan tutuldı, aralarında 10 qadın, jurnalistler ve matbuat kartları olğan «Qırım birdemliginiñ» mühbirleri bar. Tutulğanlar üç polis bölügine alıp ketirildi.
Aqmescitniñ vaqtınca tutuv izolâtorınıñ binası ögünde tutulğan 15-ten çoq qırımtatar faali Rusiye kodeksiniñ memuriy maddesine istinaden apiske alındı.
Qırım Muhtar Cumhuriyeti ve Aqyar prokuraturası qırımtatar faalleriniñ tutuluvı sebebinden cinaiy tahqiqat başlattı.
Ukraina akimiyeti, aq qorçalayıcılar, çetel elçihaneleri ve missiyaları Rusiyeni Qırımda böyle taqiplerni toqtatmasına çağıra. Rusiye akimiyeti böyle çağıruvlarnı körmemezlikke ura.