Aqmescitteki mahkeme ögünde oktâbrniñ 29-nda Rostov-na-Donuda ükmü çıqarılğan Bağçasaraydaki «Hizb ut-Tahrir davasınıñ» mabüslerine qoltutmağa kelgen eñ az 30 qırımtatar faali tutuldı. Bu aqta «Qırım birdemligi» birleşmesi Qırım.Aqiqatqa bildirdi.
Bu malümatqa köre, faaller Rusiye kontrolindeki Qırım garnizon mahkemesiniñ binası ögünde toplaşıp, üküm çıqarılmasını bekledi. Olar mabüslerniñ fotosüretlerinen ve yazılarnen beyaz atqılar kiydi: «Ne içün 16 yıl?», «Ne içün 20 yıl?».
Qırımdaki Rusiye İç işler nazirliginiñ ekstremizm ile küreş idaresiniñ merkez hadimleri Aleksey Malevanets ve Nikolay Lapik qırımtatar faalleriniñ razılığını almayıp, pasportlarını ve betlerini fotoğa çıqardı.
Birleşme malümatına köre, qırımtatar faalleri avtobusqa mindirildi. Anda kütleviy haber vastalarınıñ şeadetnamesinen eki jurnalist de alındı. Daa soñra olarnı yiberdiler.
Tutulğanlar quvetçilerniñ avtobusında, 2021 senesi oktâbrniñ 29-ı
Qırımtatar faalleri №3 «Merkeziy» polis bölügine ve №2 «Kiyevskiy» polis bölügine ketirildi.
«Qırım birdemliginiñ» malümatına köre, Aqmescitniñ Futbolistov soqağındaki merkeziy polis bölügine ketirilgenler: Kurtnezirov Enver, Kiyamov Şevket, Kurtnebiyev Anafi, Acametov Aziz, Parmanov Nariman, Enverov Eldar, Kurtseitov Osman, Suleymanov Alim, Celâlov İskandar, Mamutov Seyt-vaap, Abdurafiyev Eldar, Kononov Timur, İslâmov Ebazer, Velişayev Dilâver, Seydaliyev Mustafa, Abdulgaziyev Amar.
«Kiyevskiy» bölügine ketirilgenler: Menzatov Ablâkim, Menzatov Refat, Useinov Server, İbragimov İbragim, Beytullayev Ridvan, Yuldaşev Enver, Emirov Ayder, Narbekov Eldar, Sattayev Ali, Gaziyev Bekir, Seitmemetov Kâmran, Hudayberdiyev Enver, Umerov Ebazer, Muyedinov N.
Daa evel berilgen malümatqa köre, oktâbrniñ 29-nda Aqmescitte mahkeme binasına kelgen insanlar tutuldı.
Rostov-na-Donu Cenübiy okrugınıñ arbiy mahkemesi oktâbrniñ 29-nda Bağçasaraydaki üçünci «Hizb ut-Tahrir davasınıñ» mabüslerine üküm çıqardı. Mahkeme olarnı «akimiyetni zorbalıq yolunen zapt etüv ıntıluvında» ve «terror teşkilâtında iştirak etüvde» qabaatlı tanıp, mabüslerni sert rejimli koloniyağa almağa qarar berdi. Bu aqta mahkemeden soñ mahküm etilgen qırımlılarnıñ advokatları bildirdi.
Advokat Edem Semedlâyevniñ malümatına köre, Seytumer Seytumerov 17 yıl sert rejimli koloniyada qalmasına, Osman Seytumerov 14 yıl, Amet Suleymanov 12 yıl, Rustem Seytmemetov 13 yılğa üküm etildi. Advokatnıñ bildirgenine köre, mabüsler başta 3 yıl ve 6 ay apishanede yatmalı.
Advokatlar, ükümge qarşı istinaf şikâyetlerini berecek, dep bildirdi.
Ukrainanıñ Rostov-na-Donu konsulı Taras Malışevskiy, Ukraina tarafı bu ükümge lâyıq cevap berecek, dep ayttı.
Qırım sakinleri bu dava mabüslerine qoltutmaq içün fleşmob keçirdi ve dua yaptı, cuma künü Rostovdaki mahkeme binası ögünde onlarnen qırımlı toplaşıp, dava mabüslerini azat etmege çağırdı.
Rostov-na-Donu (Rusiye) Cenübiy okrugınıñ arbiy mahkemesinde Rusiye qabaatlavınıñ vekilleri oktâbrniñ 20-nde Bağçasaraydaki «Hizb ut-Tahrir davasınıñ» dört mabüsi içün 66 yıllıq apis cezasını talap etti.
Hatırlatamız, «Memorial» aq qorçalayıcı merkezi Bağçasaraydaki «Hizb ut-Tahrir davasınıñ» mabüsleri Seytumer Seytumerov, Osman Seytumerov, Amet Suleymanov ve Rustem Seytmemetovnı siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.