Qırımda Rusiye havfsızlıq küçleri «Ukrayina Havfsızlıq Hızmetiniñ istihbarat ağında çalışqanından» şübhelengen adamnı tuttı. Bu aqta Rusiye FSBsiniñ cemaatçılıqnen bağlar merkezine esaslanıp, Rusiye matbuatı bildirdi.
Berilgen malümatqa köre, tutulğan adam, iddia etilgeni kibi, para mukâfatı içün Rusiye Federatsiyası tarafından idare etilgen mobil operatorlarnıñ bir qaç sim-kartasını gizlegen.
«Nevbetteki gizli alâqa seansında ukrayin kuratorı şübhelige Qırım mobil operatorlarınıñ bir qaç sim-kartasını Aqmescitteki gizli yerden çıqarmaq vazifesini berdi, olarnı soñra yarımadada casus ağı qullanacaq eken», – dep qayd etile haberde.
Oña qarşı «Çetel devlet, halqara ya da çetel teşkilâtnen gizli işbirligi» maddesine istinaden (Rusiye Ceza kodeksiniñ 275.1-inci maddesi) cinaiy iş açıldı, bu maddege köre oña sekiz yılğa qadar apis cezası berile bile.
Bu dava boyunca tutulğan adamnıñ adı ve soyadı yoq.
Yaqında Qırımda Rusiye uquq qoruyıcıları Ukrayina telükesizlik hızmetine Rusiye ordusınıñ Herson vilâyetindeki yerlerine dair malümatnı bergen Ukrayina vatandaşını tuttı, dep bildirildi.
Büyük cenk başlağan soñ Rusiyede ve işğali altındaki topraqlarda cenkke qarşı çıqqanlar kütleviy şekilde taqip etile.
ZMINA İnsan aqları merkezi Tetâna Peçonçık tarif etkenine köre, Qırımda Rusiye akimiyeti tarafından devlet hainligi (Rusiye Federatsiyası Ceza kodeksiniñ 275-inci maddesi) ve çetel devletinen işbirligi (Rusiye Federatsiyası Ceza kodeksiniñ 275.1-inci maddesi) maddelerine istinaden qabaatlav sayısı arttı.
Onıñ aytqanına köre, Ukrayina aq qorçalayıcıları al-azırda 8 davanı taqip ete. Peçonçık bu maddelerge köre qabaatlav sayısı Rusiyeniñ Ukrayinağa qarşı büyük ücümi başlağan soñ arttı.
Qırım aq qorçalayıcı gruppasınıñ (QAQG) idare reisi Olga Skripnik QIRIM.News izaatlarında aytqanına köre, Qırımda eñ az 50 Ukrayina vatandaşı Rusiye uquq qoruyıcıları tarafından açılğan «satqınlıq» ve «casuslıq» davalarınıñ Iştirakçileri ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.