Qırımda eñ az 50 Ukrayina vatandaşı Rusiye uquq qoruyıcıları tarafından açılğan «satqınlıq» ve «casuslıq» davalarınıñ Iştirakçileri ola. Bu aqta Qırım aq qorçalayıcı gruppasınıñ (QAQG) idare reisi Olga Skripnik QIRIM.News izaatlarında ayttı.
Bundan ğayrı, Skripnik 2024 senesi bu maddelerge köre qadınlarnıñ taqip etilüvi quvetleşti, dep qayd etti.
«İşğal vaqtında yarımadada yaşağan qırımlılar, adet üzre, ya «casuslıqta», ya da «devlet hainliginde» qabaatlana. Ve «devlet hainligi» içün eñ az ceza 12 yıl, umumen ise 12 yıldan 20 yılğa qadar. Yani uzun müddetli apis cezasını közde tutqan pek ciddiy maddelerdir. Bu maddelerniñ astına qadınlar da kire. Ve bu tendentsiya, bizim közetüvlerimizge ve vesiqalarımızğa köre, hususan 2024 senesi şiddetlendi», – dedi Skripnik.
Onıñ aytqanına köre, birinciden Rusiye havfsızlıq küçleri adet üzre Ukrayina faallerini böyle şekilde taqip ete. Hususan daa 2014 senesi Rusiye işğaline qarşı mitinglerde faal iştirak etken, «referendumğa» qoltutmağan ve işğalge qarşı çıqqanlarğa qarşı. Skripnik tutulğanlarğa qarşı sıq-sıq işkenceler qullanıla, dep qayd etti.
Onıñ qayd etkenine köre, bu insanlarnı deñişüv cedvellerine kirsetüv pek zor ola.
«İşğal devamında, 10 yıl devamında, 2022 senesinden soñ olğan deñişüvlernen beraber çeşit siyasiy añlaşmalar çerçivesinde qaytarılğan tek 10 insan bar», – dep qayd etti o.
Yaqında Qırımda Rusiye uquq qoruyıcıları Ukrayina telükesizlik hızmetine Rusiye ordusınıñ Herson vilâyetindeki yerlerine dair malümatnı bergen Ukrayina vatandaşını tuttı, dep bildirildi.
Büyük cenk başlağan soñ Rusiyede ve işğali altındaki topraqlarda cenkke qarşı çıqqanlar kütleviy şekilde taqip etile.
ZMINA İnsan aqları merkezi Tetâna Peçonçık tarif etkenine köre, Qırımda Rusiye akimiyeti tarafından devlet hainligi (Rusiye Federatsiyası Ceza kodeksiniñ 275-inci maddesi) ve çetel devletinen işbirligi (Rusiye Federatsiyası Ceza kodeksiniñ 275.1-inci maddesi) maddelerine istinaden qabaatlav sayısı arttı.
Onıñ aytqanına köre, Ukrayina aq qorçalayıcıları al-azırda 8 davanı taqip ete. Peçonçık bu maddelerge köre qabaatlav sayısı Rusiyeniñ Ukrayinağa qarşı büyük ücümi başlağan soñ arttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
