«Qırım platformasınıñ» iştirakçi sayısı otuzdan çoq oldı – Kuleba
Dmıtro Kuleba
Ukraina Tış işler naziri Dmıtro Kulebanıñ bildirgenine köre, «Qırım platformasınıñ» iştirakçi memleket sayısı 31 oldı. Bu aqta o, Twitterde yazdı.
«Müim ortaqtan «Qırım platformasında» iştirak etecegine dair daa bir haber aldım. İştirakçi sayısı 31 oldı ve qırqqa kete. Qırımnı azat etmek içün halqara koalitsiya özegini kenişletmek içün çalışamız», – dep bildirdi nazir.
Mayısnıñ 20-nde Ukraina prezidenti Volodımır Zelenskıy «Qırım platforması» sammitine 30 memleketniñ vekilleri kelecek, dep ayttı. Onıñ bildirgenine köre, Rusiye «Qırım platformasını» pek ağır yanaşa.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.