Ukraina Tış işler naziri Dmıtro Kuleba «Qırım platformasınıñ» sammit neticelerine müsbet qıymet kesip, Rusiyeniñ cevabını «yayğara» dep adlandırdı.
«Moskva ve Rusiyege qoltutqan medianıñ yayğarasına qulaq asmaycaq. Yana», – dep yazdı o, Facebookta.
Nazir, dünyanıñ aman-aman 50 memleketinde – Şimaliy ve Merkeziy Amerikadan başlap Cenübiy-Şarqiy Asiyağa qadar – «Qırım platforması» aqqında 300-den çoq maqale basıldı, dep qayd etti.
«Raqamlar artmağa devam ete, taliliy maqaleler ve Kyivdeki sammitte olğan çetel liderleriniñ intervyü alıntıları derc etile. Dünyada millionlarnen insan «Qırım platforması» aqqında bile», – dep qayd etti Kuleba.
Avgustnıñ 23-nde Kyivde Qırımnı işğalden qurtaruv meselesinde ilk halqara formatnı resmiy şekilde işletecek «Qırım platformasınıñ» birinci inauguratsiya sammiti olıp keçti. Neticesinde Ukraina topraq bütünligini halqara seviyede tanılğan sıñırlarda ğayrıdan tiklemege çağırğan ortaq Beyanname imzaladı. Sammit iştirakçileri «Rusiye Qırım ve Aqyarnıñ vaqtınca işğalini qanunlaştırıp olamaz», dep bildirdi.
Kreml, «Qırım platformasınıñ» sammitini «Rusiyege qarşı duşmanlıq» dep adlandırdı. Avgustnıñ 24-nde Rusiye Tış işler nazirligi memleket ve halqara teşkilâtlarnıñ «Qırım platformasında» iştirak etmesi «Rusiye topraq bütünligine qast etüv» ola, dep bildirdi.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.