Rostov-na-Donu şeeriniñ Cenübiy okrugınıñ arbiy mahkemesi yanvarniñ 12-nde saat 10:00-da (Kyiv saatınen 9:00) Qarasuvbazardaki «Hizb ut-Tahrir davasınıñ» mabüsleri Enver Ömerov, Riza Ömerov ve Ayder Capparovnıñ ükmüni seslendirecektir.
Bu aqta «Qırım birdemligi» cemaat birleşmesi haber ete.
«Qarasuvbazar gruppasınıñ mahkeme oturışuvına kelmek içün 700 kilometr yol keçtik. Mahkeme esnası qapalı olur, dep tüşüngen edim, amma men, diger dindaşlarım kibi, zor vaziyette qol tutmaq er bir musulmannıñ borcu ve vazifesi ola, dep tüşünem. Halqım, epimiz añlaymız ki, bu sebepsiz qabaatlav. Terrorizm ve ekstremizm qabaatlavı. Olar böyle degil. Bu sahte dava ve biz razı degilmiz. İç bir problemge, ava vaziyetine, maddiy qıyınlıqlarğa baqmadan, er vaqıt qol tutacaqmız», – dep tarif etti mahkeme oturışuvına kirsetilmegen «Qırım birdemliginiñ» faali Enver Abselâmov.
Ukraina aq qorçalayıcı teşkilâtları Rusiyeden bütün siyasiy mabüslerni, hususan Qarasuvbazardaki «Hizb ut-Tahrir davasınıñ» mabüslerini acele azat etmesini talap ete.
Qırımda bu dava mabüslerine qol tutmaq içün fleşmob keçirile. 1000-den çoq kişi öz fotoresimlerini «Qırım birdemligi» cemaat birleşmesine yolladı.
Qarasuvbazardaki «Hizb ut-Tahrir davasınıñ» mabüsleri soñki sözüni aytacaq Cenübiy okrugınıñ arbiy mahkemesi oturışuvı dekabrniñ 28-nde qadı Roman Saprunovnıñ hastalığı sebebinden lâğu etildi.
2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.
Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.