Qırımda Rusiye nezaretinde olğan Qarasuvbazar mahkemesiniñ sulh mahkemecisi yerli caminiñ imamı Murtaza Ablâzovnı «Qırım Musulmanları diniy idaresiniñ şeaadetnamesi olmadan cuma namazını keçiregni içün» 15000 ruble para cezasına mahküm etti.
Bunı Qırım.Aqiqatqa «Qırım birdemligi» cemaat birleşmesi haber etti.
Faallerniñ malümatına köre, Ablâzov RF memuriy uquq bozması qanunnamesiniñ 5.26 maddesine binaen qabaatlağanlar (qanunsız missionerlik faaliyeti). Soñra ise mahkme para cezasını da bergen.
«Qırım birdemligi»niñ malümatına köre, fevralnıñ 8-nde diger Qırım imamı Sudaqlı Ablâkim Galiyev aynı memuriy uquq bozma boyunca 5 biñ ruble para cezasını ödegen.
Kreml kontrolindeki Qırım Yuqarı mahkemesi mahkeme tarafından cuma namazını qıldırğanı içün para cezasınen cezalandırılğan imam Dilâver Halilovnıñ ükmüne qarşı advokatnıñ istinaf şikâyetini red etti.
«Qırım aq-uquq qoruyıcı gruppası» yarımada işğal etilgen zamanı devamında Qırım RF-nıñ memuriy uquq bozma qanunnamesiniñ 5.36 maddesine binaen diniy teşkilâtlar ve olarnıñ azalarına qarşı 91 memuriy dava açılğanını bildire. Bu davalar çerçivesinde eñ azından 73 memuriy cöreme ükmü çıqarılğan, olarnıñ umumiy miqdarı 1 075 500 ruble.