«Çetel vatandaşlarına» Qırımnıñ çoqusı rayonında topraq saibi olmağa yasaqlağan Rusiye prezidenti Vladimir Putinniñ buyruğı yarımada sakinlerini Rusiye vatandaşlığını almağa «zorlağan daa bir usul» ola. Bu aqta martnıñ 22-nde Qırım aq qorçalayıcı gruppası bildirdi.
Aq qorçalayıcılar, Putinniñ Qırımdaki topraq buyruğı halqara gumanitar uquq normalarını boza, dep qayd etti.
«Cenk qanunları ve adetleri nizamnamesiniñ 46-ncı maddesi işğalci devletke şahsiy mülkni musadere etmege yasaqlamaqta», – dep aytıla Qırım aq qorçalayıcı gruppasınıñ Facebook haberinde.
2021 senesi martnıñ 20-nden itibaren Rusiye prezidenti Vladimir Putinniñ «çetel vatandaşlarına» Qırımnıñ çoqusı rayonında – yalı boyu ve esas Ukrainağa yaqın rayonlarda topraq saibi olmağa yasaqlağan buyruğı işke tüşürile.
Rusiye qanunlarına köre, işğal altındaki yarımadada yaşağan Ukraina vatandaşları bu kategoriyağa kirmey.
Daa evel belli olğanına köre, işğal etilgen Qırımda «Rusiyeniñ sıñır topraqlarındaki» 9747 topraq damartısı Ukraina vatandaşlarına ait.
Ukraina Tış işler nazirligi, Qırımnıñ çoqusı rayonlarında «çetel vatandaşlarına» topraq saibi olmağa yasaq etken Rusiye prezidenti Vladimir Putinniñ buyruğı «uquq ceetinden bir şeyge yaramay», dep bildirdi.
Qırım Muhtar Cumhuriyetiniñ prokuraturası Qırımda ukrainalılarnı topraqsız qaldıruv «sistematik zulum» dep adlandırdı.
Müessise, «1949 senesiniñ cenk vaqtında vatandaş ealisini qoruv şartnamesiniñ bozuluvı ve Halqara cinaiy davanıñ Roma statutına köre arbiy cinayet olğan» Qırımda «devlet ve şahsiy mülkni aluv» boyunca cinaiy tahqiqat alıp bara.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.