Primorskiy qasabasında (Kefe) 130-ğa yaqın adam dekabrniñ 14-nde evinde keçirilgen tintüvden soñ tutulğan qırımtatar Kurtumer Çalgozovnıñ evi yanında toplaştı.
Bunı "Qırım birdemligi" cemaat birleşmesi haber etti.
"Men, Bağçasaraydan arqadaşlarım ile birlikte Kefege Kurtumer Çalgozovnıñ qorantasına destek bildirmek içün keldim. Yaqında evinde tintüv olıp keçti, soñra FSB hadimleri onı cinaiy davanen qorquzıp, verbovka yapmağa tırıştı. Başına kelgen er şeyni aşkâr etti. Qorqmayıp aşalavlar, aqaretler, tehditler aqında aytıp berdi. Bu diqqatqa lâyıqtır. Şunıñ içün de biz mında oña, qorantasına qoltutmaq içün keldik", - dedi faal Enver Seytmemetov.
Kurtumer Çalgozov
Dekabrniñ 14-nde tintüvlerden soñ Primorskiy (Kefe) qasabasında tutulğan qırımtatarı Kurtumer Çalgohov Rusiye FSBsiniñ hadimleri onı cinaiy davanen qorquzıp, onı verbovka yapmağa tırıştı, dep bildirdi.
«Qırım birdemligi» bildirgenine köre, dekabrniñ 14-nde saba Primorskiy qasabasında (Kefe) Rusiye quvetçileri 23 yaşında qırımtatarı Kurtumer Çalgozovnı tutıp, belli olmağan tarafqa alıp ketti. Onıñ cep telefonı alındı. Tintüv vaqtında Çalgozovlar qorantasınıñ bütün azaları evde edi – baba, ana, Kurtumer ve kiçigi 7 yaşında olğan eki qız qardaşı.
Soñra «Qırım birdemligi» Rusiye quvetçileri Çalgozovnı «Anğara köyündeki gaz borusında diversiya» dava boyunca sorğuğa çekti, dep bildirdi.
Soy-soplarnıñ aytqanına köre, Kurtumer furunhanede çalışa, ciu-citsu sportunen meraqlana, ara-sıra yarışlarğa bara.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.