«Qırım birdemligi»niñ faaliyetçisi Server Mustafayevniñ tevqif etilmesi «birleşmeniñ çalışmasında aks etilmez». Bunı Qırım advokatı Emil Kurbedinov «Qırım birdemligi»niñ Aqmescitte mayıs 26-da keçken nevbetteki oturışuvında söyledi, dep bildire Qırım.Aqiqat muhbiri.
Kurbednov: «Bu vaqia «Qırım birdemligi»niñ bir daa toplaşmaması ve halqnıñ aqları oğrunda küreşmemesi içün sebep olmaycaq. O, aksine, insanlarnı birleştirecek», – dep saya.
Areketniñ koordinatorlarından birisi Dilâver Memetov, öz nevbette, «Qırım birdemligi»niñ bu oturışuvı, FSB hadimleri tarafından yaqalanğan ve Rusiyede yasaq etilgen «Hizb ut-Tahrir» teşkilâtında iştirak etüv şübhesi boyunca iyün 9-ğa qadar tevqif etilgen Server Mustafayevsiz birinci kere keçe, dep qayd etti.
Memetov: «Biz Server Mustafayevniñ tevqif etilmesini bütün «Qırım birdemligi»ne, cemiyet areketinde faal iştirak etkenlerniñ episine tazyiq etüv, dep sayamız. Ve aynı zamanda Server Mustafayev ve (Bağçasaray faaliyetçisi – QA) Edem Smailovnıñ tevqifi – tazyiqnıñ, faallikke baqmayıp, er keske qarşı yapılğanını köstere», – dedi.
Qırım adliyecisi Lilâ Gemeci de «ekstremistik maddeler» boyunca yaqalanuvlar ve tevqiflerni, qırımtatar halqına tazyiq etüv içün bir manaçıq olğanını saya, çünki «Qırım terroristleri aqqında narrativge endi kimse inanmay».
«Qırım birdemligi»niñ mayıs 26-daki oturışuvında 80 kişi – Qırım siyasiy mabüsleriniñ doğmuşları, qırımtatar faaliyetçileri ve advokatları iştirak ettiler.
Aqmescitte «Qırım birdemligi»niñ oturışuvı, 2018 senesi mayıs 26 künü
«Qırım birdemligi»niñ faaliyetçisi Server Mustafayev FSB hadimleri tarafından mayıs 21-de Bağçasarayda yaqalandı.
Onıñnen beraber Bağçasaray rayonındaki Topçıköy (Dolinnoye) köyüniñ sakini Edem Smailov – soñki on beş yıl içinde Bağçasarayda musulman diniy merasimlerini keçirgen imanlı musulmannı yaqaladılar.
Olar ekisi de Rusiyede yasaq etilgen «Hizb ut-Tahrir» musulman din teşkilâtında iştirak etkenlerinden şübheli sayılalar.
İlhaqtan soñ Qırımdaki faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler keçire.