Ukrainada ekspertlerniñ celp etilmesi ile bir qaç qanun teşebbüsi işlep çıqıla. Olarnıñ maqsadı, işğal etilgen territoriyalarda kollaboratsionizm problemasını çezmektir. Bunı Qırım.Aqiqat Radiosı efirinde İnsan aqları boyunca Helsinki birleşmesiniñ adliyecisi Maksim Timoçko söyledi.
Onıñ aytqanına köre, kollaboratsionizm, arbiy cinayetler ve Ukrainanıñ topraq bütünligi içün telüke doğurğan areketler meselelerini çezmek kerek. Bunıñ içün bir qaç vatandaş teşebbüsi ve muzakere meydançığı yaratıla.
Timoçko: «Mehanizmniñ meydanğa ketirilmesi üstünde ekspertler ve devlet ukümet organları çalışa. Halqara gumanitar uquq ve Jeneva konventsiyası normalarınıñ bozuluvlarında qabaatlı olğan, arbiy cinayetler işlegen insanlar iç şübhesiz cevapkârlıqtan qaçınamazlar. Bular arasına em kolonizatsiya, em Qırım sakinleriniñ qanunsız olaraq Rusiye ordusına askerlikke aluv, em hususiy mal-mülkniñ ekspropriatsiyası yer almaqtalar. Bütün bu vaqialar vesiqalaştırılacaq. Lâkin meseleniñ cemiyet içinde aks-sada doğurğanı sebebinden muzakere ekspertler ve toplulıqnıñ celp etilmesi ile keçirile», – dedi.
Bunıñnen beraber adliyeci, bu meselelerniñ Qırımnıñ deokkupatsiyası ile alâqalı olaraq aktual olğanlarını, çünki «keçit devri adliyesiniñ esas talaplarından biri – cevapkârlıq meselesini çezmektir», dep qayd etti.
İnsan aqları boyunca Helsinki birleşmesiniñ adliyecisi Maksim Timoçko ile tolu intervyüni Qırım.Aqiqat saytında yaqın künlerde oquñız.
Ukraina içki işler naziri Arsen Avakov, Ukrainağa işğal etilgen territoriyalarnıñ reintegratsiyası içün afu etüv ve kollaboratsionizmge dair qanun bazasını işlep çıqmaq kerek olacaq, dep bildirdi.
Ukrainanıñ Vaqtınca işğal etilgen territoriyalar ve devlet içinde mecburen köçken şahıslarnıñ meseleleri boyunca nazirligi rehberiniñ birinci muavini Yusuf Kurkçi, kollaboratsiya aqqında qanun deokkupatsiyanıñ arfesinde peyda olmaq kerek, dep bildirdi.