Ukrainada AQŞ elçisi Mari Yovanoviç, iqtisadiy sanktsiyalar Qırımnıñ deokkupatsiyası meselesinde muim bir Rusiyege tazyiq aleti olalar, dep saya. Bunıñnen beraber o, «Qırım Ukrainanıñ sıñırları içine qaytmağance» sanktsiyalar rejiminiñ quvette olacağını ilâve etti.
Yovanoviç: «AQŞta aydın bir siyaset bar, o, tıpqı Ukrainanıñ siyaseti kibi, yani Qırım – Ukrainadır. Ve bu deñişmeycek… Dünya toplulığı ve Ukrainanıñ özü, mevcut olğan bütün aletlerni qullanmaq kerekler. Misal içün, iqtisadiy sanktsiyalar, muim aletlerden biridir. Biz bu sanktsiyalarnı saqlap qalamız, ve biz olarnıñ eda etilmesini temin etemiz. Ondan ğayrı biz, olarnıñ faal ve tesirli olğanlarında emin olmaq içün er vaqıt cedvelni közden keçiremiz», – dedi.
O, Qırım sakinleri Rusiye tarafından ilhaq etilgen territoriyadaki yaşayışnı Ukrainadaki yaşayışnen qıyas ete bilmeleri içün Ukrainağa reformalar yolunen ileri ketmek pek muimdir, dep ilâve etti.
Your browser doesn’t support HTML5
Санкции против России продолжатся до деоккупации Крыма – Йованович (видео)
AQŞ elçisi: «Ukraina – Meydanda olğan insanlarnıñ oğrunda küreşken devletleri, aqiqiy işlegen demokratiya, mahkemeler insanlarğa adalet, uquq ve menlikni temin etken, iqtisadiyatı olğan ve inkişaf etken devlet olsa, men bellesem, özüne çeküv quveti de çalışacaq – insanlarda eki taraftan birisinde yaşamaq variantı olsa, olar mutlaqa böyle bir devlette yaşamaq isterler. Qırım oğrağan vaziyettden farqlı olaraq. Anda pek sert devlet kontroli, öz fikirlerini ifade etmege qorqqan insanlar ve er kün turğunlaşqan iqtisadiyat bar – bu, insanlar kerçekten de yaşamaq istegen devlet degil», – dep qayd etti.
Bunıñ arfesinde AQŞ Devlet kâtibi vazifesini eda etken Con Sallivan, AQŞ Devlet departamentiniñ dünyada insan aqlarını aqqında yıllıq maruzasınıñ taqdim merasiminde çıqışta bulunıp, Rusiyeni Qırımdaki vaziyet, Donbasstaki problemalar ve Çeçenistandaki insan aqlarını qorçalav meselelerine diqqat etmege davet etti.
Aprel 6-da AQŞ Maliye nazirligi sanktsiyalar cedveline bir qaç iri Rusiye oligarhı, ve şu cümleden Oleg Deripaska ve Viktor Vekselbergni, ve olarğa ait işhanelerni kirsetti. Bu, ruble kursu ve Moskva birjasındaki kotirovkalarnıñ tüşmesine, em de dünya birjalarında Deripaskağa ait «Rusal» şirketi aktsiyalarınıñ bir kereden bayağı tüşmesine ketirdi.
Bundan soñ Rusiye Devlet Dumasına, AQŞnıñ yañı sanktsiyalarına cevap berilmesini közde tutqan qanun leyhası taqdim etildi. Rusiye tarafından tatbiq etilecek çareler arasında, Amerika ilâclarınıñ ketirilmesine yasaq bar.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.