AQŞ devlet kâtibi vazifelesini eda etken Con Sallivan, cuma künü, aprel 20-de AQŞ Devlet departamentiniñ dünyada insan aqları aqqında yıllıq maruzasınıñ taqdim etilmesinde çıqışta bulunaraq, Rusiyeni Qırım etrafındaki vaziyet, Donbasstaki problemalar ve Çeçenistanda insan aqlarınıñ qorçalavı meselelerine diqqat etmege davet etti.
Sallivan: «Biz Rusiyeni, Ukrainağa ait Qırımnıñ deşetli işğalini toqtatmağa, Rusiyeniñ rehberligi altında olğan quvetlerniñ Ukrainadaki Donbassta yapqan bozuluvlarnı toqtatmağa ve Çeçenistanda cezalanmayıp qalğan insan aqlarınıñ bozuluvlarına diqqat ayırmağa tekrar davet etemiz», – dedi.
Ondan ğayrı, AQŞnıñ tış işleri muessisesinde Rusiyeni «Ğarp devletleriniñ suverenitetini bozğanında» qabaatladılar.
Vesiqada: «Ülke (Rusiye – QA) Ukrainanıñ şarqınaki ve Suriyedeki çatışmalarda olduqça büyük rolni olynadı. Anda insan aqları boyunca teşkilâtlar, barışıqlı sakinlerniñ biñlerce ölümlerini, em de insan aqlarınıñ diger bozuluvlarını Rusiyeniñ rehberligi altında olğan quvetler ve Qırımdaki işğalci ordusınıñ işleri dep köstereler», – denile.
Kreml tarafından açıq menbalarda bu hususta berilgen izaatlar şimdilik yoq.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
