Baardeki Rusiye ordusına askerlikke çağıruv esnasında ilhaq etilgen Qırımnıñ sakinlerini birinci kere Rusiyeniñ Strategik maqsatlı raketa ordularına (SMRO) yollaycaqlar. Bunı aprel 10-da Rusiye Mudafaa nazirligi bildirdi.
Bildirüvde: «2018 senesi baardeki askerlikke çağıruv esnasında askerlikke çağırılğan gençlerden 8 biñden ziyadesi Strategik maqsatlı raketa ordularınıñ birleşmeleri ve arbiy qısımlarını tekmilleştirmek içün ayırıldı. Şimdiki askerlikke çağıruv kampaniyası esnasında qararnen 2,5 biñ askerlikke çağırılğan genç, SMRO içün kence arbiy mutehassıslarnı azırlağan talim merkezlerine yollanacaq», – denile.
Rusiye Mudafaa nazirliginde, ekskavatorcı, greyderci, tip hadimleri ve aşçılar kibi zenaatlarğa 200 kişini başlanğıç zenaat tasili sistemasından almaq planlaştırılğanını iddia eteler.
SMRO – Rusiye Silâlı quvetleriniñ ordular şubesi, onıñ strategik nükleer quvetleriniñ esas terkibiy qısmıdır. SMROnıñ maqsadı, ihtimallı tecavuznı toqtatmaqtır.
Kremlniñ kontroli altında olğan Qırım ukümetiniñ malümatına köre, 2018 senesinde Rusiye ordusına eki biñden ziyade Qırım sakinini çağırmaq isteyler. Öz nevbette, Qırım Muhtar Cumhuriyeti prokuraturası yarımadanıñ sakinlerini, Rusiye ordusına askerlikke çağırılıp, celpnameler alğanlarını bildirmege davet ete ve Rusiyeniñ areketlerine qanunsız deyler.
BMTniñ Ukrainada insan aqları boyunca Monitoring komissiyası, 2017 senesinde Rusiye silâlı quvetlerine eñ az 4800 Qırım sakininiñ çağırılğanını bildirgen edi.
Aprel 2-de Ukrainanıñ qıtadaki qısmında, mayısnıñ soñuna qadar devam etecek baardeki muddetli arbiy hizmetke çağıruv başlandı.