Ukraina prezidenti Petro Poroşenko Ukraina Qaramanı mukâfatını Qırımda elâk etilgen Reşat Ametovnıñ oğlan qardaşına taqdim etti. Bu hsusta prezidentniñ Facebooktaki saifesinde bildirile.
Poroşenkonıñ Facebooktaki saifesinde: «Ukrainanıñ şanlı oğlu Reşat Ametov Qırımda işğalcilerge qarşı özüni ayamayıp muqavemet kösterdi. Bugün onıñ qardaşı Refat elâk olğan Qaramannıñ mukâfatını aldı. Qaramanlar ölmey», – dep bildirile.
2017 senesinde Ukraina prezidenti Petro Poroşenko 2014 senesinde elâk etilgen qırımlı Reşat Ametovğa Ukraina Qaramanı unvanını berdi.
Reşat Ametov 2014 senesi martnıñ 3-nde, sözde «referendum»ğa qarşı bir kişilik narazılıq ile Qırım ükümetiniñ binası yanına çıqqanda alıp qaçılğan edi. Martnıñ 15-nde Ametovnıñ cesedi eziyetlev izleri ile Qırımda Qarasuvbazar rayonındaki ormanda tapılğan edi. Faaliyetçiniñ cenazesi 2014 senesi mart 18 kününde Aqmescitteki «Abdal» şeer mezarlığında yapıldı.
Moskvanıñ kontroli altında bulunğan Qırım ükümeti qırımtatar faaliyetçisini elâk etkenleriniñ tapılması içün mukâfat berecegini vade etti. Lâkin faaliyetçiniñ qatilleri ale daa tapılmadı.