Advokat Aleksey Ladin Kremlniñ kontroli altında bulunğan Aqmescit rayon mahkemesiniñ yanvar 23-te Aqmescit rayonınıñ Novıy Mir köyünde yapılğan tintüvden soñ yaqalanğan qırımtatar İsmail Ramazanovnıñ 30 künge apis etilmesine dair qararına resmen şikâyet etti.
Azatlıq Radiosı yanındaki rus hizmetiniñ muhbiri Anton Naumlükniñ Facebookta bildirgenine köre, Ladin ondan ğayrı «İsmailovnı tintüv ve yaqalanuv esnasında kötek etkenleri boyunca prokuraturağa ariza yolladı».
Naumlük: «İmayem altında bulunğan şahıs maña, FSB hadimleri, özüne qarşı ifadeler bermege mecbur etmek maqsadınen oña qarşı eziyetlev ve psihologik zorbalıq qullanğanlarını bildirdi… 2018 senesi yanvarniñ 23-nde saba saat 4-ke yaqın vaqıtta FSB hadimleri Ramazanov yaşağan yerge kirdi ve tintüv yapmazdan evel imaym altında bulunğan şahısnıñ üstüne kurtkanı atıp, bir çoq darbe endirdiler… Tintüv bitken soñ FSB hadimleri «Gazel» avtomobilinde Ramazanovnı uzun vaqıt devamında köteklediler. Onıñ aytqanına köre, arqasına, büyrekleri bulunğan yerge, başına, eñsesine doğru, qollar ve ayaqlarına bir çoq darbe endirdi, parmaqlarını perttiler», – dep, advokatnıñ sözlerini naqil ete.
Onıñ malümatına köre, Ramazanov tıbbiy baqunması içün Aqmescit hastahanesine alıp barıldı, anda «darbelerniñ izleri qayd etildi, lâkin bundan soñ da onı maşinada köteklediler».
Rusiye telükesizlik hadimleri tarafından bu hususta açıq menbalarda izaat berilmedi.
Yanvarniñ 23-nde ilhaq etilgen Qırımnıñ Aqmescit ve Kirov rayonlarında Rusiye telükesizlik hadimleri tintüvler ötkerdi. O künü Novıy Mirde ekstremizniñ propagandasında qabaatlanğan qırımtatar İsmail Ramazanovnıñ evi tintüv yapıldı.
Daa soñra Rusiyeniñ Qırım boyunca Tahqiqat komitetinde, tergevciler internet-radio vastasınen ekstremistik materiallarnıñ darqatılmasında qabaatlanğan Aqmescit rayonı sakinine qarşı cinaiy iş açılğanı aqqında bildirdiler.
Kremlniñ kontroli altında bulunğan Aqmescit rayon mahkemesiniñ akemi İrina Kirillova Ramazanovnı fevralniñ 23-ne qadar 30 künge apiske yolladı.
İlhaqtan soñ Qırımda Rusiyeniñ amelde akimiyeti mustaqil jurnalistler, cemiyet faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli tanılğan Qırım musulmanlarınıñ evlerinde muntazam surette kütleviy tintüvler yapa.