İlhaq etilgen Qırımnıñ Aqmescit ve İslâm-Terek rayonlarında rusiyeli küç idaresiniñ hadimleri tintüvler ötkerdi, dep haber ete yanvarniñ 23-nde «Qırım birdemligi» cemaat teşkilâtı.
Faaller bergen malümatqa köre, küç idaresiniñ hadimleri Novıy Mir köyünde (Aqmescit rayonı Rodnikovoye köyüniñ artında yerleşmekte) yaşağan İsmail Ramazanovnıñ evinde tintüv keçirip, onı ekstremizm propagandası yapqanında qabaatlağanlar.
Eski Qırımda tüntüv 27 yaşındaki aydavcı Muhsin Cambaznıñ evinde ötkerilgen.
«Muhsinniñ evinde qart anası bar eken, Muhsinniñ özü ise, artıq işke ketken, ancaq evinde küç idaresiniñ hadimleri olğanını eşitken soñ, aman yetişip kelgen. Tintüv esnasında ev penceresiniñ camları uçurılğan. Ev Muhsinniñ ana-babasına ait. Al-azırda tintüv bitti. Şimdi küç idaresiniñ hadimleri Muhsin yaşağan Primorskoye qasabasındaki kvartirasına keçdiler», – dep haber ete «Qırım birdemligi».
Rusiyeli küç idareleriniñ saytlarında tintüvnen alâqalı malümat yoq. Qırım.Aqiqat olıp keçkenlerniñ inceliklerini bilmege areket ete.
Qırım işğalinden soñ yarımadada mustaqil jurnalistler, cemaat ve qırımtatar milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
