Zararlı himiyaviy maddelerniñ taşlanmasına oğrağan Ermeni Bazar (Armânsk) şeeriniñ mektepleri balalarnı sentâbrniñ 26-sına, çarşenbe künü qabul etip başlaycaq. Bunıñ aqqında Qırım reisiniñ birinci muavini Yuriy Gotsanük haber etti.
“Ârından (sentâbr 25 - QA) bala bağçaları çalışıp başlaycaq, çarşenbe kününden ise balalar mektepke qatnacaq, işte, er şey yahşı. Mektep sınıflarında, bağça odalarından dımlı çulnen cıyıştıruv daa bir kere keçirildi. Balalarnı qabul etmek azırlığı eñ yüksek seviyede. Telüke yoq”, - memurnıñ sözlerinden yaza TASS agentligi.
Gotsanükniñ aytqanına köre, Ermeni Bazarğa bazarertesi künü aqşam sanatoriy-kurort müessiselerinden 1570 bala ve büyükler qayttı. Sentâbr 25-i aqşamğace daa 1300 balanı qaytaracaq olalar.
Qırım şimalinde zararlı taşlantılar aqqanda daa çoq malümat Qırım.Aqiqat saytında tapa bilesiñiz.
Sentâbr 23-yünde yerli sakinler, fevqulâde vaziyetiniñ red etüvinden soñ şeerge balalar qaytarılıp başlağanı içün içtimaiy ağlarda haber etti.
Avgustnıñ 23-nden 24-ne keçer gecesi Ermeni Bazarda zararlı himiyeviy taşlantı atılğanı qayd etildi. Qırım memuriyeti, zararlı maddeler avağa atıluv sebebi - sıcaqtan ve uzun müddet yağış olmağanıdan, “Qırım titanı” qullanğan ekşilik havzularından çıqqan buvlanuvı dep iddia ete.
Faqat Kyiv, Qırımda himiyeviy taşlantılarnıñ avağa atılmasına Rusiye arbiyleri sebepçi olğan dep iddia ete, çünki olar idman yapqanda titan ve soda zavodlarınıñ taşlantılarına ateş açqan emiş.
Qırımnıñ rusiyeli başlığı Sergey Aksönov, Ermeni Bazardan (Armânsk) mektep çağına yetmegen ve mektep çağındaki balalarnı avanıñ bulaşuvı içün Qırım sanatoriylarına yollacaqları aqqında haber etti.
Sentâbr 14-yünde “Qırım titanı” zavodından zararlı maddelerniñ taşlanmasından soñ fevqulâde vaziyet ilân etildi.