Fevralnıñ 28-nde ukrain falleri Herson vilâyeti ile memuriy sıñırda işğal etilgen yarımada tarafına Qırım sakinleri için mesajlarnen Ukraina bayrağını uçurttılar. Aktsiya Qırımnıñ Rusiye işğaline qarşı tirenüv kününe bağışlanğan, dep haber etti Qırım. Aqiqat mühbiri.
Aktsiya koordinatorlarından biri İsmail Ramazanovnıñ aytıp bergenine köre, bundan bir qaç kün evel bayraq Kyivdeki "Qırım evi"nde edi. Er istegen kelip Qırım sakinleri içün bir şeyler yazıp oldı.
«Balalar: «Qırım-Ukraina», "Qırım Ukraina olacaq", dep yaza ediler. Türkiye, Letoniyadan diasporamız muracaat etip, olarnıñ adından da bir şey yazmamnı istediler. Bu bayraq Qırım memlesi etrafında yalıñız Qırım sakinlerini degil, ukrainlerni de birleştirecek. Bu bizni küreşimizni devam etmege ilhamlandıra», – dedi Ramazanov.
Qırım sakinleri için mesajlarnen Ukraina bayrağı
Onıñ sözlerine köre, bayraq üstünde Milliy Meclis reisi Refat Çubarov ve Milliy Meclis azası İlmi Ümerov da öz mesajlarını yazğan. Bundan ğayrı, salı künü bayraqnı Yuqarı Radağa ketirgenker. Anda millet vekilleri de öz mesajlarını yazıp oldı.
Uzunlığı 20 ve keñligi 6 metrlik bayraqnı Kramatorsktan köçken göñülli Oksana Muravlöva tikken.
Fevralnıñ 26-nda qayd etilgen Qırım ve Aqyarnıñ işğalge qarşı tirenüv kününede ukrain göñüllieri yarımada üzerinde, şu cümleden Ermeni Bazar şeerinde üç biñge yaqın vatanperver yazılarınen varaqa taşlap çıqtılar.
Qırım ve Aqyarnıñ Rusiye işğaline qarşı tirenüv kününde yarımada ve Herson ile memuriy sıñırda Ukraina ve qırımtatar bayraqlarını yelpirettiler.
Qırım ve Aqyarnıñ işğalge qarşı tirenüv kününide Hersonda merkeziy meydanda qırımtatar halqınıñ bayrağını köteridiler.
Ukraina prezidenti Volodımır Zelenskıy, fevralnıñ 26-nda, cuma künü, Qırımnıñ işğalden azat etilüvi ve reintegratsiyası içün yapılğan tedbirler aqqında ferman imzaladı.
Fevralnıñ 26-nda Qırım MC ve Aqyarnıñ Rusiye işğaline qarşı tirenüv kününde Ukraina TİN halqara toplulığını Rusiyege qarşı siyasiy ve sanktsiyalar tazyığını quvetleştirmege davet etti.
Ukraina Yuqarı Radasınıñ insan aqları vekâletlisi Lüdmila Denisova feralnıñ 26-nda Qırım MC ve Aqyar şeeriniñ işğaline qarşı tirenüv kününde, Qırımnıñ qaytarıluvı oğrunda küreş devm ete, dep qayd etti.
Fevralniñ 26-nda cemaatçılıqnıñ teşebbüsi ile «Qırımnıñ Rusiye işğaline qarşı tirenüv künü» qayd etile. 2014 senesi fevralniñ 26-nda Qırım Muhtar Cumhuriyetiniñ Yuqarı Şurası ögünde Ukraina topraq bütünligine qoltutuv mitingi olıp keçken edi. Miting iştirakçilerine qarşı Rusiye tarafdarları, hususan «Rus birligi» firqası çıqtı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.