Advokat Aleksey Ladin, Qırım.Aqiqat mühbirine tefsir bergende, ilhaq eilgen Qırımda dekabrniñ 20-sinde Yalta blogeri ve jurnalisti Yevgeniy Gayvoronskiyniñ sürgüni "Rusiye territoriyasından" sürgüni aqqında qararnı qabul etti, dep bildirdi.
"Rusiye territoriyasından zoraki çıqaruv. Şimdilik o, Krasnodar ülkesinden olğan sürgün etilecek adamlarnıñ politsiyanıñ mahsus merkezine yollanıldı. Mahkeme hızmetçileri onı tintti ve ondan soñ Gayvoronskiyni şu merkezge yolladılar. Ukraina vatandaşını böylece sürgün etilgeni evelde iç olmadı", - qoştı advokat.
Aleksey Ladin, Gayvoronskiy Donbassta qayd etilgeni içün ve adamlarnı qayd etilgen yerine sürgün eteceklerini bilip, onı onı "DNR"ge yollacaqlarından saqına.
Gayvoronskiyniñ sürgüni aqqında qarar
Şimdilik ilhaq etilgen Qırımnıñ resmiy müessiselerinden bu malümatnıñ tasdıqı yoq.
İlhaq etilgen Qırımda dekabrniñ 20-sinde bloger ve jurnalist Yevgeniy Gayvoronskiyni politsiyanıñ Massandra bölügine alıp kettiler. O, dekabr 20-sinde onıñ mahkemesi olmaq kerek, dep haber etken edi.
Oktâbrniñ 31-inde Gayvoronskiy içtimaiy ağlardaki Rusiye prezidenti Vladimir Putin aqqında yazı içün Rusiye Memuriy kodeksiniñ 20.1 maddesine köre qabaatladılar.
Yaltada Rusiye uquq qoruyıcıları martnıñ 6-nda «Primeçaniya» Aqyar neşiri ile iş tutqan jurnalist ve bloger Yevgeniy Gayvoronskiyniñ yaşağan yerini tintti. Bu aqta Rusiye tarafdarı cemaatçısı İlya Bolşedvorov Qırım.Aqiqatqa haber etti.
Yevgeniy Gayvoronskiy Donetskte dünyağa keldi, yerli aliy oquv yurtunıñ jurnalistika bölüginde oqudı ve şeerde jurnalist olıp çalıştı. Yaltada bir qaç yıl yaşay. Daa evel «Narodnoye yedinstvo» yerli Rusiye tarafdarı cemaat teşkilâtınıñ matbuat kâtibi olıp çalışqan edi. Onıñ faalleri 2014 senesi mart ayında yarımadanıñ Rusiyege qoşuluvı aqqında «referendum» keçirilmesi içün imza toplağan edi. Soñra Gayvoronskiy «Yevraziyskiy jurnal» Rusiye tarafdarı mecmuasınıñ muarriri oldı. Bu vazifede Yalta yalısında kösterilgen Rusiye prezidenti Vladimir Putinniñ er yılki beyanatı vaqtında onı maqtağan edi. Bir müddet Gayvoronskiy «Komsomolskaya pravda» Rusiye neşiriniñ Qırım muarririyetinde mühbir olıp çalıştı. İşten boşatılğan soñ ise yerli akimiyetni tenqit etkeni içün muhalifet dep adlandırılğan «Primeçaniya» Aqyar neşiri ile işbirligi yapmağa başladı. Bazı maqaleler içün jurnalist Yalta akimiyetini de raatsızlay. Ara-sıra onı şeer şurasınıñ sessiyasına yibermeyler.
2018 senesi fevral ayınıñ başında qırımlı jurnalist Yevgeniy Gayvoronskiy onı Yalta merkezinde köteklegenler, dep bildirgen edi. Onıñ aytqanına köre, o künü oquyıcı ile körüşip, şeer parkında olacaq tamir işlerini muzakere etecek edi. Jurnalist bu ücümni Yalta iş adamı Dmitriy Tükayev sımarladı, dep tüşüne. Gayvoronskiy onıñ «işine ve qanun bozuvlarına» bir qaç jurnalist tahqiqatını bağışlağan edi. Tükayev bu ikâyede onıñ adı keçkeni içün Gayvoronskiyge qarşı namus, itibar ve iş reputatsiyasını qorçalamaq içün dava açtırğanını bildirdi. Gayvoronskiy olıp keçken adiseni özü azırlağanında qabaatlandı.