Rusiye kontrolindeki Qırımnıñ Bağçasaray rayon mahkemesi Qırımdaki Rusiye İç işler nazirliginiñ yerli bölüginiñ daa evel Rusiyede «terrorizmge açıq çağırğanı» içün mahküm etilgen ve 2,5 yıl yaşav tarzı koloniyasında bulunğan vatandaş jurnalisti Nariman Memedeminovnı memuriy nezaret altına almaq talabını red etti.
Bu aqta «Qırım birdemligi» cemaat birleşmesi Memedeminovnıñ advokatı Emil Kurbedinovnıñ aytqanlarına esaslanıp haber ete.
Advokatnıñ aytqanına köre, qanunğa köre memuriy dava açtıruv müddeti üç ay ola. Memedeminov aman-aman bir yıl evelsi azatlıqqa çıqtı, bu dava qanaatlendirilmez, imaye bunı mahkemege bildirdi.
«İnsannıñ iç bir şeyi kefil etilmey, demek. Beş yıl keçse de, böyle dava açtıra bileler, bir müddetke baqmaylar, ve insan 5 yıldan soñ nezaret altına alınır», – dedi Kurbedinov.
«Şimdi beraber olğan fotoresimlerimizni çıqarmağa tırışamız». Azat etilgen Nariman Memedeminovnıñ ayatından bir kün (fotoresimler)
Bağçasaray rayonındaki Rusiye İç işler nazirliginiñ bölük vekili mahkeme qararını daa izaatlamadı.
Bağçasaray rayonındaki Rusiye polisi Nariman Memedeminov içün bir sıra yasaq çıqarmağa talap etken edi. Areket serbestligi sıñırlanacaq ve onı «ayda eki kere uququ qoruyıcı organlarını ziyaret etmege» mecbur etecek ediler.
Memedeminov bunı «basqı ve taqip» dep adlandırdı.