Qırım ve Aqyardaki Rusiye Tahqiqat komitetiniñ Rusiye FSBsiniñ qırımtatar halqıniñ lideri Mustafa Cemilevniñ davasını mahkemege bermesinde hata oldı, dep bildire advokat Nikolay Polozov.
«Bugün (iyünniñ 8-nde – QA) Qırımdaki Rusiye Tahqiqat komitetiniñ Baş tahqiqat idaresi Mustafa Cemilevge qarşı dava mahkemege berildi, dep çevik bir şekilde bildirdi. Yaqın Qırım prokuraturasına da hiyanet etti», – dep yazdı advokat Facebook saifesinde.
Onıñ aytqanına köre, Rusiye Ceza protsessual kodeksiniñ 222-nci maddesiniñ 1-inci qısmına köre, qabaatlayıcı qarar tasdıqlanğan soñ, prokuror davanı mahkemege yollap, qabaatlanğan insanğa, imayecisine, zarar körgenge, vatandaş davacısına, vatandaş davalısına ve (ya da) vekillerine haber ete ve ilk diñlev keçirilmesi aqqında muracaat etmek aqqı aqqında bildire.
«Körgenimiz kibi, qanunda tahqiqatçı, tahqiqat organınıñ reberi, tahqiqat organı prokurornıñ davanıñ mahkemege yollanılğanına dair bildirüvde adresat olaraq qayd etilmegen. İşğal etilgen Qırımda er şey tam ters. Meni (imayecisini) haberdar etmediler, Mustafa ağanı haberdar etmediler, birinciden qanunsız bir şekilde tahqiqat organını haberdar etkenler, o da tez-tez bildirdi. Prokuror efendiler, hata yaptıñız», – dep qayd etti Polozov.
Rusiye ve işğal etilgen Qırım müessiseleri advokatnıñ aytqanlarına şimdilik cevap bermedi.
Mustafa Cemilev de Qırım ve Aqyardaki Rusiye Tahqiqat komitetiniñ areketlerine cevap bermedi.
Qırımda mayısnıñ 27-nde Rusiye Tahqiqat komiteti qırımtatar halqınıñ lideri Mustafa Cemilevge qarşı «cinaiy dava» tahqiqatını yekünledi.
Cemilevniñ Qırım.Aqiqatqa bildirgenine köre, o, onı Rusiyede ve işğali altındaki Qırımda taqip etkenlerge qarşı ğarbiy sanktsiyalarnıñ kenişletilüvini talap etmege niyetlene.
Advokat Nikolay Polozov işğal altındaki Qırımda qırımtatar halqınıñ lideri Mustafa Cemilevge qarşı davanıñ ilk tahqiqatı yekünlene, dep bildirdi. Polozov Rusiye FSBsiniñ qırımtatar halqınıñ lideri Mustafa Cemilevge qarşı Qırımda açqan dava malümatını incelep, kelişiksizliklerni taptı.
Qırımdaki Rusiye Tahqiqat komitetiniñ idaresi aprelniñ 13-nde qırımtatar halqınıñ lideri Mustafa Cemilevni Rusiye Ceza kodeksiniñ üç maddesine köre qabaatladı. Advokat Nikolay Polozovnıñ aytqanına köre, şimdi Cemilevge qarşı oğlu Hayserniñ ukrain davası qullanıla.
Ukraina prezidentiniñ Qırım Muhtar Cumhuriyetindeki temsilciligi Rusiye tahqiqatçılarınıñ qırımtatarlarnıñ milliy lideri Mustafa Cemilevge qarşı cinaiy davasını siyasiy taqip dep saya.
2014 senesiniñ başında Rusiye Qırımnı işğal etken soñ Rusiye akimiyeti qırımtatarlarnıñ liderleri Refat Çubarov, Mustafa Cemilevniñ yarımadağa kirişini beş yılğa yasaqladı.
2016 senesi yanvarniñ 20-nde qırımlı advokat Cemil Temişev Rusiye kontrolindeki Aqmescit Kiyev rayon mahkemesiniñ qararı esasında Mustafa Cemilevniñ ğıyabiy apiske alınması aqqında bildirdi. Bu malümatnı daa soñra Qırımnıñ sabıq Rusiye prokurorı Natalya Poklonskaya da tasdıqladı.
Temişevniñ malümatına köre, Rusiye organları Cemilevni 2014 senesi mayısnıñ 3-nde Ermeni Bazarda Qırımnıñ memuriy sıñırından qanunsız keçkeninde qabaatlay. Rusiye tahqiqatı, Rusiye Cemilevniñ yarımadağa kirişini endi yasaqlağan edi, dep bildire.
Ukraina Tış işler nazirligi Mustafa Cemilevniñ Rusiye mahkemesi tarafından ğıyabiy apiske alınmasını takbih etti.