Advokat Nikolay Polozov Rusiye FSBsiniñ qırımtatar halqınıñ lideri Mustafa Cemilevge qarşı Qırımda açqan dava malümatını incelep, kelişiksizliklerni taptı.
Polozovnıñ Qırım.Aqiqat mühbirine bildirgenine köre, davada Rusiye qanunlarına uyğun olmağan üç esas şey bar.
«Birincisi – 224 maddesine istinaden dava malümatınıñ büyük qısmı ukrain tilinde berilgen, hususan tapılğan silâ cenkte qullanılğanına dair ekspertiza. Rusiye qanunlarına köre, bütün dava malümatları rus tilinde olmalı», – dep añlattı Polozov.
322 maddesiniñ 3-nci qısmına istinaden «Rusiye devlet sıñırını qanunsız keçüv» qabaatlavına köre, dava malümatlarında Mustafa Cemilev «Armânsk» Rusiye keçiş noqtasından qanunsız şekilde keçti, dep aytıla, amma 2014 senesi qanunlarğa köre böyle keçiş noqtası yoq edi.
«O, aytılğan cinayetten bir yıl keçken soñ qayd etildi. Böylece, tahqiqat cinayet yapılğan yerni belgilemedi. Dava malümatlarında Mustafa Cemilevniñ Qırımğa kiriş yasağını tasdıqlağan vesiqa da yoq. Bundan ğayrı, Cemilev bu yasaq aqqında kerekli kibi haberdar etilmedi. Yani vesiqa gizli ve onı kimse körmedi: ne men advokat olaraq, ne müvekkilim, ne de tahqiqatçı (pek müim davalar tahqiqatçısı Magomed Magomedov – QA)», – dep qoştı o.
Advokatnıñ qayd etkenine köre, «silânı qanunsız aluv, berüv, satuv, saqlav ya da taşımada» Cemilevni mesüliyetke çeküv müddeti daa 2019 senesi bitti.
Polozov, işğal etilgen Qırımda Cemilevge qarşı davanıñ ilk tahqiqatı yekünlendi, dep bildirdi.
Qırımdaki Rusiye Tahqiqat komitetiniñ idaresi aprelniñ 13-nde qırımtatar halqınıñ lideri Mustafa Cemilevni Rusiye Ceza kodeksiniñ üç maddesine köre qabaatladı. Advokat Nikolay Polozovnıñ aytqanına köre, şimdi Cemilevge qarşı oğlu Hayserniñ ukrain davası qullanıla.
Cemilevniñ Qırım.Aqiqatqa bildirgenine köre, o, onı Rusiyede ve işğali altındaki Qırımda taqip etkenlerge qarşı ğarbiy sanktsiyalarnıñ kenişletilüvini talap etmege niyetlene.
Ukraina prezidentiniñ Qırım Muhtar Cumhuriyetindeki temsilciligi Rusiye tahqiqatçılarınıñ qırımtatarlarnıñ milliy lideri Mustafa Cemilevge qarşı cinaiy davasını siyasiy taqip dep saya.
2014 senesiniñ başında Rusiye Qırımnı işğal etken soñ Rusiye akimiyeti qırımtatarlarnıñ liderleri Refat Çubarov, Mustafa Cemilevniñ yarımadağa kirişini beş yılğa yasaqladı.
2016 senesi yanvarniñ 20-nde qırımlı advokat Cemil Temişev Rusiye kontrolindeki Aqmescit Kiyev rayon mahkemesiniñ qararı esasında Mustafa Cemilevniñ ğıyabiy apiske alınması aqqında bildirdi. Bu malümatnı daa soñra Qırımnıñ sabıq Rusiye prokurorı Natalya Poklonskaya da tasdıqladı.
Temişevniñ malümatına köre, Rusiye organları Cemilevni 2014 senesi mayısnıñ 3-nde Ermeni Bazarda Qırımnıñ memuriy sıñırından qanunsız keçkeninde qabaatlay. Rusiye tahqiqatı, Rusiye Cemilevniñ yarımadağa kirişini endi yasaqlağan edi, dep bildire.
Ukraina Tış işler nazirligi Mustafa Cemilevniñ Rusiye mahkemesi tarafından ğıyabiy apiske alınmasını takbih etti.
