Moskvanıñ Lefortovo mahkemesi iyülniñ 17-nde bıltır noyabr ayında Qırım yalısında Rusiye tarafından zapt etilgen ukrainalı deñizcilerniñ dördünci gruppası – Roman Mokrâk, Andrey Oprısko, Vladimir Tereşçenko, Sergey Tsıbizov, Andrey Şevçenkonıñ apis müddetini oktâbrniñ soñuna qadar uzattı. Bu aqta rusiyeli advokat Nikolay Polozov haber ete. Böylece, 24 ukrainalı deñizciniñ apis müddeti uzatıldı.
Andrey Artemenko, Andrey Eyder ve Vasiliy Soroka oktâbrniñ 26-na qadar, qalğanlarnı 24-ne qadar nezaret altında qalacaq.
Nikolay Polozovnıñ bildirgenine köre, keçken sene noyabr ayında Qırımda sıñırlav tedbiri tayin etilgende yaralılarnıñ mahkemesi keççe keçirilgen edi, şu sebepten kün farqı bar.
Dört mahkeme oturışuvı prokurorlarnıñ muracaatı ile qapalı şekilde oldı.
Dört oturışuvda da imayeniñ BM deñiz uquqı halqara mahkemesiniñ ferman kopiyalarını qoşuv muracaatları red etildi. Vesiqağa binaen, ukrainalı esir deñizciler acele azat etilmeli, dedi Polozov.
İmaye, iyülniñ 17-nde ukrainalı deñizcilerniñ apis müddetini uzatqan mahkeme qararlarını şikâyet etmege azırlana.
Your browser doesn’t support HTML5
Moskva: ukrainalı deñizcilerniñ apis müddeti oktâbrniñ 24-ne qadar uzatıldı (video)
Ukraina ve Rusiye ombudsmenleri Lüdmila Denisova ve Tatyana Moskalkova iyülniñ 16-nda Moskvada keçirilgen körüşüvde eki memleketniñ SİZO ve apishanelerinde bulunğan ukrainalı ve rusiyelilerniñ cedvellerini deñişti. Ukraina Yuqarı Radasınıñ insan aqları vekâletlisi 150 davadan ibaret cedvelni berdi.
2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.