Ukraina ve Rusiye ombudsmenleri Lüdmila Denisova ve Tatyana Moskalkova iyülniñ 16-nda Moskvada keçirilgen körüşüvde eki memleketniñ SİZO ve apishanelerinde bulunğan ukrainalı ve rusiyelilerniñ cedvellerini deñişti, dep haber ete Azatlıq Radiosı.
Rusiye kütleviy haber vastalarınıñ malümatına köre, Ukraina Yuqarı Radasınıñ insan aqları vekâletlisi 150 davadan ibaret cedvelni berdi.
«Rusiye Federatsiyasında ve Qırımda tutulğan Ukraina vatandaşları, şu cümleden 24 deñizci», – dedi Denisova.
Vekâletliler eki memleketniñ prezidentlerine muracaat etip, bir sıra mahkümniñ afu etilmesini rica etmege niyetlengenini bildirdi.
«Bir sıra vatandaşnıñ afu etilmesine dair muracaat meselelerini muzakere ettik. Olarnıñ soyadlarını şimdilik aytmaycam, evelden ümütlenmesinler dep. Bu mesele ciddiy baqılmalı», – dedi Rusiye ombudsmeni.
Lüdmila Denisova tutulğan vatandaşlarnıñ, şu cümleden ukrainalı deñizcilerniñ, deñiştirilüvi olacağına ümüt etkenini bildirdi.
Tünevin ombudsmenler Kyivde körüşti. Rusiye ve Ukrainada tutulğan Ukraina ve Rusiye vatandaşlarınıñ azat etilüv meseleleri baqıldı.
Tatyana Moskalkovanıñ iyülniñ 15-nde bildirgenine köre, Ukrainada apiske alınğan 50 rusiyeliden 27-si azatlıqtan marum etüv yerlerinde qala, olardan 13-ü cezasını çeke, qalğanları – mahkeme qararlarını ya da istinaf neticelerini bekley.
Ukraina Tış işler nazirliginiñ malümatına köre, Rusiye 70-ten ziyade ukrainalını qanunsız alda tuta. Olarnıñ arasına 2018 senesi noyabr ayında Qara deñiz yalısı yaqınlarında Rusiye tarafından zapt etilgen 24 ukrainalı deñizci ve Donbastaki esirler kirmemekte.
2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
