Litvaniya Cumhuriyetiniñ parlamenti iyünniñ 6-nda 1944 senesi mayısnıñ 18-nde qırımtatar halqınıñ Qırımda sürgün etilgenini genotsid olaraq tanımaq qararına rey berdi. Bu aqta Qırımtatar Milliy Meclisiniñ reisi Refat Çubarov Facebook saifesinde bildirdi.
Onıñ aytqanına köre, toplaşuvda olğan 79 parlament deputatından bu qararğa 77-si qoltuttı.
«Qarşı reyler olmadı. Litvaniya halqı ve Litvaniya siyasetçileri sağ olsunlar», – dep aytıla haberde.
Mayıs ayında Ukrainanıñ BM daimiy vekili Volodımır Yelçenko teşkilâtnıñ baş kâtibi Antonio Guterreşke Qırımtatar Milliy Meclisiniñ BM aza devletleriniñ parlament ve ükümetlerine qırımtatar genotsidini tanımaq muracaatını bergen edi.
Ukraina Tış işler nazirligi 2019 senesi mayısta qırımtatar sürgünliginiñ 75 yılı munasebetinen beyanatnı aydınlatıp, dünya toplulığını 1944 senesi qırımtatar sürgünligini qırımtatar halqınıñ genotsidi olaraq tanımasına çağırdı.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.