Qırımtatar Milliy Meclisiniñ reisi Refat Çubarov «5 kanal» ukrain telekanalına izaat berip, mayısnıñ 2-nde qırımtatarlar Qırımnıñ memuriy sıñırından «Çonğar» keçiş noqtasından keçmege planlaştıra, dep bildirdi.
Çubarovnıñ aytqanına köre, zorbalıqsız tirenüv aktsiyasını «Qırımnıñ Rusiye ilhaqını er vaqıt sözde takbih etken halqara teşkilâtlar bunı memuriy sıñırdan keçüvge qoşulıp areketlerinen isbatlasın dep keçirecekler», dep yaza kütleviy haber vastası.
Meclis reisiniñ qayd etkenine köre, birinci sıralarda Meclis azaları, halq deputatlar, ğarbiy ortaqlar ketecek. Çubarov, işğal altındakim yarımadağa küç qullanıp kire bileceklerini inkâr etmey, dep haber ete «5 kanal».
«Rusiye bütün imkânlarını qullanıp, qırımtatarlarnı olarnıñ toprağından quvacaq ola. Qırımtatarlar içün, belki de, 1944 senesiniñ sürgünliginden berli ilk sefer kerçek bir telüke bar», – dep ayttı siyasetçi.
2019 senesi dekabrniñ 6-nda Çubarov esas Ukrainadan Rusiye işğal etken Qırımğa taba yürüş keçirilecek ve azırlıq başladı, dep ilân etti. Çubarovnıñ bildirgenine köre, belli mesleatlardan soñ erkânı aydınlatılacaq ştab endi quruldı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.