Kyivde Ukrainanıñ insan aqları vekâletlisiniñ ofisi binasına sentâbrniñ 7-nde saba yolcu avtobusları keldi. Anda Rusiyede tutulğan Ukraina vatandaşlarınıñ tuvğanları mindirile. Azatlıq Radiosı ve Qırım.Aqiqat canlı yayın köstere.
Qırım.Aqiqat mühbiriniñ bildirgenine köre, birinci avtobus ombudsmen ofisinden çıqtı.
Tuvğanlarnı qayda alıp keteler belli degil. İnsan aqları vekâletlisi ofisiniñ matbuat hızmetiniñ reberi İrina Zakriniçnaya Qırım.Aqiqatqa izaat berip, tuvğanlarnı qayda alıp ketkenlerini aytmadı.
«Tuvğanlarğa er taraflama maneviy yardım ve destek kösteremiz. Er biriniñ ikâyesi ve vaziyeti farqlı. Er kes kibi haber bekleymiz», – dedi o.
Onıñ aytqanına köre, insan aqları vekâletlisiniñ ofisine mabüslerniñ tuvğanları mahsus davet etilmegen edi.
«Olar toplaşıp, ofiske kelgenler, kelgenler bar», – dedi Zakriniçnaya.
Qırım.Aqiqat mühbiriniñ bildirgenine köre, birinci avtobus qomşu soqaqqa ketip toqtadı.
Daa evel haber etilgeni kibi, Ukraina Yuqarı Radasınıñ insan aqları vekâletlisiniñ ofisine cumaertesi künü, sentâbrniñ 7-nde, saba Rusiyede tutulğan Ukraina vatandaşlarınıñ tuvğanları kele.
Bundan evel «İnterfaks» politsiya ve mahsus hızmetler refaqatında eki büyük turist avtobusı Moskva merkezinden Kiyev şossesi boyunca pek tez keçip, «Vnukovo-2» ükümet terminalına kirdi, dep bildirdi. «Vnukovo-2» ükümet terminalı ögünde GİBDD ve politsiya yoq.
Bundan evel avtobuslar «Lefortovo» SİZOsını terk etti. Advokatlar gruppasınıñ reberi Nikolay Polozov apiske alınğan ukrainalı deñizciler cumaertesi künü Moskvadaki «Lefortovo» SİZOsını terk etti, dep bildirdi Qırım.Aqiqatqa.
Avgustnıñ 30-nda gece Ukraina ve Rusiye arasında tutulğan şahıslarnıñ deñişüvi olacağına dair ilk haberler peyda oldı. Bu aqta keçken çağırılış halq deputatı Artur Palatnıynıñ yardımcısı Anna İslamova yazdı, onıñ malümatını Ukrainanıñ yañı baş prokurorı Ruslan Râboşapko paylaştı. Daa soñra bu yazı yoq oldı.
Ukraina telükesizlik hızmetiniñ spikeri Olena Ğitlânska avgustnıñ 30-nda saba bildirdi ki, «reinelerni deñişüv boyunca zor muzakereler esnası devam ete». O, jurnalistlerni «yañlış malümat tarqatmamalarına» çağırdı. Aynısını Ukraina prezidenti Volodımır Zelenskıynıñ ofisi de yazdı.
Daa soñra Ukraina telükesizlik hızmeti Ukraina ve Rusiye arasında tutulğan şahıslarnı deñişüv künü belgilengen soñ onı kütleviy haber vastalarına bildirmege vade etti.
Soñki aftaları kütleviy haber vastaları Rusiye ve Ukraina «33-ke 33» deñişüv (Rusiye Deñiz uquqı boyunca halqara mahkemeniñ qararı esasında azat etilecek Qara deñizde zapt etilgen ukrainalı deñizcilerni de bu formulağa kirsete) aqqında añlaştı, dep bildire. Avgustnıñ 23-nde Ukraina prezidenti Volodımır Zelenskıy Ukraina ve Rusiye arasında tutulğan şahıslarnı deñişüvniñ «birinci neticeleri» eñ yaqın vaqıtta olacağına ümüt etkenini bildirgen edi.