Yalta sakini Elina Mamedovağa qarşı “VKontakte” içtimaiy ağında yapqa üç repost içün cinaiy iş açıldı. Yazılarnı qız 2014-2015 seneleri bir qaç ukrainacı gruppalarından repost etti. Elina olarnıñ müellifi degil, sadece öz saifesine yerleştirdi. Şimdi qız Rusiye CK-niñ 282-nci maddesine (milletlerara zıddiyet çıqaruv) köre qabaatlana. 2018 senesi iyün ayından berli Mamedova ev tevqifi astında.
İyınniñ 13-üne saat 10:30-da rus quvetçileri, Elina aqayı ve ana-babası ile yaşağan evge, keldi. Binada keçirilgen “teftiş” vaqtında eki telefon, eki planşet, netbuk, sistemlik blokı ve qattı diskler (hard disk) alındı. FSB hadimleri özü kelmedi dep ayta Elinanıñ anası Lütfite Mamedova. O künü azbar qapısını o açqan edi.
“Olar öz şaatlarınen keldi – eki genç: qız ve oğlan. FSB-niñ bütün hadimleri sade urbada edi, amma olarnıñ kim olğanını ve ne içün kelgenlerni men birden añladım”, - dep hatırlay Lütfiye.
Лутфие Мамедова
Elina aytqanı kibi, o FSB-niñ kelgenini öz dostuna aytıp yetiştirdi, dostu ise bu haberni tarqattı. Bir qaç saattan soñ ise, onı tahqiqat komitetine kelip, öz areketlerni añlatmağa mecburladılar.
“Endi keldik, şaatlıq etip başladıq – yarıq söndi, tamam şu künü Qırımda yarıq olmadı. Ne advokatnen bağlanmaq, ne de qorantama kelecek vaqtımı haber etmekniñ çaresi yoq edi. Maña devlet advokatı berilgen edi, soñundan men ondan vazgeçtim”, - dep hatırlay Elina.
Şimdi Elinanıñ aqlarını uquqçı Aleksey Ladin qorçalay. Tahqiqat endi psihologik-lingvistik ekspertizasını tayinledi.
“Espertizanı makeme eksperti Kudasova keçirecek. Onen Qırımda oşağan cinayet işleri boyunca çalışqanda sıq-sıq rastkelişe edik. Neticeler tahqiqatnıñ versiyasını tasdıqlacağına men, aman-aman, yüz fayız bere bilem. Şunıñ içün, mustaqil ekspertni celp etmege isteyim”, - qayd ete Ladin.
Алексей Ладин
“Aleksey Ladin bu işimni alğan soñ, tahqiqatçı - advokat olmasa edi, bu iş eki ayda qapalacaq edi dep ayttı. Sanki, o daima çeşit türlü qoşma ekspertiza ve vesiqalarnı talap ete, buña çoq vaqıt masraf ete dep ayttı. Men ise onı diñlep tüşüne edim: demek, advokatım güzel”, - küle Elina.
Cinayet işiniñ açılmasına sepeb olğan, üç yazı 2014-2015 senelerinde yapıldı. Protokolğa köre, olarnıñ teşkerüvi 2017 senesi başlandı, Mamedovlarnıñ evine ise, rus quvetçileri 2018 senesi keldi. Elina bu yazılarda ne olğanını dos-doğru hatırlamağanını ayta.
“Anda ruslarğa qarşı bir şey oldı dep aytmam. Ülkemniñ topraqlarına silâ ile kelgen adamlarğa qarşı edi, mında öldürüv ve zorbalıqnen öz tertip-nizamını qurmaq istegen adamlarğa qarşı edi”, - dey qız.
Лутфие Мамедова вспоминает, как ее опрашивали.
Lütfiye Mamedova onı nasıl sorğuğa çekkenlerini hatırlarlay.
“Qızımnen “VK”da yazışammı, ne yollayım dep soray ediler. Men, köpek, mışıq süretlerini, tırnaq boyalav çeşitlerini, dep cevaplandım”, - dey apay.
Elina – manikür ustası, 2014 senesine qadar ukrain banklarınıñ birisinde çalışa edi.
“İşten meraqlı olmağanı içün kettim, dülberliknen oğraşmağa istedim. Aslı menim iqtisadiyat boyunca qızıl diplomım ve mektepten altın medalim bar. Şimdi menim tek altın medalnen qızıl diplomım degil de, cinayet işim de bar”, - dey Elina Mamedova.
Cinayet davası açılmasınıñ ilk sebebi olaraq, Elina qomşularnıñ çaquvıdır dep saya: “Olar daa Ukraina vaqtında babama qarşı çeşit türlü iftira yaza edi. Evimiz balaban, ayvanımız çoq, balalarnıñ episi universitette oquy – demek mıtlaqa mında bir qıl bar! Men bunı pahıllıq kibi körem”.
Elina dey ki, şimdi çoq adam oña qol tuta.
“Maña Facebookta tanış ve tanış olmağanlar çoq yaza, qoltuta. Tintüv aqqında haber keñ yayınlanğanı içün, Almaniyadaki tanışlarım de endi bile – qorqtılar, ebet. Qısqası, meni meselemnen baş-başqa qaldırmaylar”, - dey qız.
Şimdiki vaqıtta. Elina Mamedovağa ülkeden çıqmacağı aqqında ketmemezlik senetini imzattılar. Elina qabaatlanğan maddege köre mahküm etilgenler – para cezası, mecburiy işler ya da eki-beş yıllıq apis cezasını çeke.