İyün 13-te Yaltada yaqalanğan Elina Mamedovanı sorğudan soñ Rusiye Tahqiqat komitetiniñ Qırım bölüginden yiberdiler. Bunı «Qırım birdemligi» faaliyetçilerine qıznıñ aqrabaları bildirdi.
Bildirüvde: «Aqrabaları, Mamedova Elinanı,yañıçıq, ketmezlik senedini imzalatıp, yiberdiler, dep bildireler», – denile.
Rusiye FSBsi hadimleri 27 yaşlı Elina Mamedovnı Autka (Çehovo, Yalta) köyündeki evini tintken soñ yaqaladılar. Advokat Edem Semedlâyevniñ malümatına köre, onı Rusiye Cinayet kodeksiniñ 280-nci maddesi (Cemiyet içinde yapılğan ekstremistik areketlerge davet) boyunca qabaatlaylar.
Rusiye telükesizlik muessiseleriniñ saytlarında tintüv ve yaqalanuv aqqında malümat şimdilik yoq.
İlhaqtan soñ Qırımdaki faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler keçire.
