Qırımda üç aftadan berli yañı koronavirus hastaları qayd etile. Rusiye kontrolindeki yarımada akimiyetiniñ bildirgenine köre, çoqusı – ketirildi. Şu sebepten regionda yañı-yañı sıñırlav tedbirleri ilân etile. Bu afta hastalanğan qırımlılarnıñ sayısı ve virus tarqalğanda neler oldı – Qırım.Aqiqatnıñ maqalesinde oquñız.

İlk koronavirus hastası yarımadada martnıñ 21-nde qayd etildi. O vaqıttan berli resmiy şekilde qayd etilgen hastalarnıñ sayısı otuzdan çoq oldı. Birinci afta 18 qırımlı ve beş aqyarlı hastalandı. Ekinci afta memurlar hastalarnıñ sayısı eksile, dep bildirdi. Lâkin bu afta hastalanğanlarnıñ sayısı kene artıp başladı – Qırımda ve Aqyarda ondan çoq insan virusqa oğradı. Üç biñden çoq insan yuqunç telükesi sebebinden közetüv altında buluna.

Qırımda koronavirus tarqaluvınıñ köstergiçleri halqara teşkilâtlar ve diger mustaqil menbalar tarafından teşkerilmedi. Olar tek 2014 senesi Qırımda qurulğan Rusiye akimiyet organlarınıñ malümatına esaslana.

Qırım aq qorçalayıcı gruppasınıñ koordinatorı Olga Skripnik Qırımda hastalanğanlar aqqında resmiy malümatnı «doğru» dep saymay. Onıñ aytqanına köre, şimdi izolâtsiyağa közetüv altına yollanılğan alâqada olğanlarğa test yaptırılsa edi, o vaqıt hastalıq ne qadar tarqalğanını körmek mümkün edi.

Tailand, Yaponiya ve Meksikadan kelgen virus

Qırımda ilk koronavirus hastası qayd etilgeninden Rusiye kontrolindeki yerli akimiyet künde birden bir qaç hastanı qayd etip başladı. Hastalarnıñ ekseriyeti ketirildi, altı yerli ola, ve üçü qorantadan.

Aprelniñ 10-nda Qırımdaki Rospotrebnadzor idaresiniñ yolbaşçısı Natalya Penkovskaya Keriçte qayd etilgen bir qaç koronavirus hastası aqqında bildirdi. «Martnıñ 8-nden 27-ne qadar olar (hastalar – QA) Tailandda edi, soñra Şeremetyevo ava limanına (Moskva) keldi, andan – Aqmescitke. Alâqada olğan insanlarnıñ sayısı belli, şahıslar tibbiy közetüv altına alındı», – dep tarif etti o, Qırım ükümetindeki koronavirus yuqunçınıñ tarqaluvına qarşı ştab toplaşuvında.

Natalya Penkovskaya

Rusiye kontrolindeki Qırım yolbaşçısı Sergey Aksenov eki hasta bar, dep qayd etti.

Şu künü Qırım Sağlıq nazirligi çetelden qaytqan bütün qırımlılardan sağlıq vaziyetlerini ve kontaktlarını bildirmelerini rica etti.

Qırımda rekord hasta sayısı aprelniñ 8-nde qayd etildi. O künü saba Yaponiyadan qaytqan qırımlınıñ virusı tapıldı. Sergey Aksenov, hasta kelgen soñ izolâtsiya rejiminde tibbiy közetüv altında qaldı, dep bildire. Virus tasdıqlanğan soñ, onı yuqunç hastahanesine aldılar.

O künü aqşamğa yaqın Qırım akimiyeti daa üç hasta aqqında haber etti. Hastalardan biri Moskvadan keldi, daa ekisi – qorantadan. Üçü de hastahanege alındı.

Daa eki koronavirus hastası aprelniñ 7-nde qayd etildi. Ekisi de – Kezlevden. Şeerniñ şeer ve bala poliklinikleri hastalarnı qabul etmey ve profilaktika tedbirlerini ala.

Qırım akimiyeti aprelniñ 6-nda daa bir hasta aqqında ilân etti. Sergey Aksenovnıñ malümatına köre, qırımlı Yaltağa Meksikadan Moskva üzerinden qayttı. O, observatorğa alındı. O künü Yunanistandan Kefe yalısına kelgen «Varvara» yahtasınıñ ekipajı da observatsiyağa berildi.

Koronavirus Qırımda: Kezlev civarındaki observator nedir (video)

Komendnant saatı telükesi altında

Qırım akimiyeti sıñırlav tedbirleri bozulğanını qayd etmege devam ete. Yasaqqa baqmadan, soqaqlarğa çıqqan pensionerler esas bozucı ola. Bu yalığa yaqın regionlarda daa çoq körüne, insanlar deñizge yaqın kezmege istey.

Qırım otelleri de yasaqqa riayet etmey.

İyünniñ 1-ne qadar turistlerni yerleştirmege yasaq olsa da, bunı gizliden yapmağa tırışalar, dep bildire Qırımnıñ kurort ve turizm naziri Vadim Volçenko.

Vadim Volçenko

Şu sebepten Sergey Aksenov sıñırlav tedbirlerini daa ziyade sertleştirmege vade ete, yarımadada vaziyet fenalaşsa, komendant saatı bile ilân etilmesi mümkün.

Rusiye kontrolindeki Qırım yolbaşçısı Sergey Aksenov ve baş nazir Yuriy Gotsanük Qırım Nazirler Şurasınıñ toplaşuvında

«Körem ki, maşinalarnıñ sayısı tez arttı. Bu daa bir tarqaluvğa qadar ya da bir yerde merkez olur. Er şeyni qapatmağa mecbur olacaqmız ve (qomşu Rusiyedeki – QA) Krasnodar ülkesinden daa küçlü bir rejim olacaq. Tenbileyim. Tertipsizlik başqalarnı telükege oğrata. Diqqatlı olmañıznı rica etem», – dedi o.

Rusiye kontrolindeki Qırım parlamenti koronavirus telükesi sebebinden yarımadada ilân etilgen özüni izolâtsiya etüv rejimini ve müessiselerniñ işindeki qaidelerni bozğanlarğa qarşı mesüliyet sertleştirilüvine dair qanun leyhasını qabul etti.

Para cezaları şahıslar ve memurlar içün 4 biñden 40 biñ rublege qadar ve şirketler içün 300 biñ rublege qadar olacaq.

Kilitli hastahane

Bu afta Ermeni Bazar ikâyesi rezonans çıqardı. Aprelniñ 8-nde koronavirus telükesi sebebinden anda merkeziy hastahane qapatıldı. Moskvadan qaytqan yerli sakinniñ soyu gipertonik krizinen hastahanege oğradı ve ekimlernen alâqada oldı. Akimiyet onıñ talil neticelerini daa almadı, amma hastahane qapatıldı ve Rusiye gvardiyasınıñ hadimleri tarafından sarıp alındı.

Hastahane ekimleri ve hastalarınıñ testleri menfiy çıqqan soñ da memurlar qararını deñiştirmedi. Karantin vaqtında hastahanede bütün hastalarnı Ermeni Bazardan şeerden 20 ve 80 kilometr uzaqta olğan Yañı Qapı ve Canköy hastahanelerine yollaylar.

Olga Skripnikniñ bildirgenine köre, Ermeni Bazar hastahanesi meselesinde cevapsız sualler qala.

«Monitoringimizge köre, Qırımnıñ tibbiy sisteması COVID-19-ğa iç azır degil. Ermeni Bazarda hastanen alâqada olğan insanlarnıñ bir qısmına testler daa yapılmadı, amma olarnı izolâtsiyağa yolladılar, dep bilemiz. Kerçekni bilmeymiz, em ekimler, em qalğan sakinler arasında qaç kişi hasta olğanını bilemeymiz», – dedi Skripnik Qırım.Aqiqatqa.

Qırımda yerli akimiyeti koronavirus hastaları içün 300 yer azırladı. Aqmescitteki Semaşko tibbiy merkezinde aqcigerni suniy avalandıruv cihazlarınen 45 reanimatsion yeri azırlanıldı.

Aqmescitteki Semaşko tibbiy merkezinde reanimatsiya yerleri azırlanıldı

Qırım Sağlıq naziri İgor Çemodanovnıñ aytqanına köre, hastalar müessiselerge «yuqunç bokslarınen donatılğan mahsus maşinalarnen ketirilecek».

Aqyar para cezaları ve mukâfatları

Aqyarda Rusiye kontrolindeki yerli akimiyet bu afta şeerde üç koronavirus hastasını qayd etti. Biri aprelniñ 9-nda tasdıqlandı. Kelgen hasta, dep bildire yerli memurlar.

«Aprelniñ 1-nde aqyarlımız paytahttan qayttı, özüni izolâtsiya etüv vaqtında Moskvağa tibbiy hızmet içün ketti, aprelniñ 1-nde evge qayttı. Qayd etmek isteyim ki, aprelniñ 1-nde sert bir izolâtsiya rejimi ilân etildi, amma vatandaşlarımız böyle qararlar ala», – dep ayttı şeer valisi vazifelerini eda etken Mihail Razvojayev.

Hasta Aqyarnıñ Daşa Sevastopolskaya №3 hastahanesine ketirildi. Bu hastahanede memurlar observator yaptı.

Daa eki insannıñ koronavirusı aprelniñ 7-nde tasdıqlandı. Olar şeerge Moskvadan Aqmescit üzerinden keldi. Memurlar aprelniñ 1-nde «Red Wings ava şirketiniñ vz 307» uçuşınen Moskvadan Aqmescitke kelgen er kesten acele haber etmesini rica ete.

Umumen Aqyarda sıñırlav tedbirleri olğan soñki üç afta devamında beş koronavirus hastası aqqında haber etildi. Dördü tüzeldi, dep bildire akimiyet.

Aprelniñ 6-ndan itibaren Aqyarda özüni izolâtsiya etüv rejimini bozğanlarğa qarşı ilk protokollar tizilip başlandı. Şeerde karantinge riayet etilüvini teşkermek içün arbiy politsiyanıñ hadimleri celp etildi.

Mihail Razvojayev şeer ekimlerini mukâfatlandırmağa vazife berdi. «Keçken aftanıñ soñunda tibbiyet hadimlerini mukâfatlandırmaq içün federal para ketirildi. Öz tarafımdan, koronavirus yuqunçına qarşı çalışqanlarnı mukâfatlandırmaq içün Aqyar bücetinden de bermege vazife bergen edim. Bu afta bütün paralar berilmeli», – dep ayttı o.

Laboratoriyada koronavirus testi yapıla

Rusiye kontrolindeki Aqyar ükümeti koronavirus aqibetlerini yoq etmek içün 803,4 million rublelik maliyeviy yedek yapıldı, dep haber etti.

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.