Ukraina aq qorçalayıcılarınıñ fikirince, işğal etilgen Qırımnıñ Rusiye kontrolindeki akimiyeti yarımadada koronavirus hastaları aqqında doğru malümat bermey.
Bu aqta Qırım aq qorçalayıcı gruppasınıñ koordinatorı Olga Skripnik Qırım.Aqiqat Radiosınıñ yayınında ayttı.
Onıñ bildirgenine köre, Rusiye akimiyeti pandemiyağa yahşı azırlanmadı.
«Monitoringimizge köre, Qırımnıñ tibbiy sisteması COVID-19-ğa iç azır degil. Ermeni Bazarda hastanen alâqada olğan insanlarnıñ bir qısmına testler daa yapılmadı, amma olarnı izolâtsiyağa yolladılar, dep bilemiz. Kerçekni bilmeymiz, em ekimler, em qalğan sakinler arasında qaç kişi hasta olğanını bilemeymiz», – dedi Skripnik.
Onıñ fikirince, böyle vaziyet bütün Qırımda ola bile.
«Olğan malümatımızğa köre, Rusiye akimiyeti aydınlatqan hasta sayısı doğru degil. Hastalarnen alâqada olğanlarnıñ testi yapılmay, aytqanları kibi, közetüv altında tutalar», – dep qoştı aq qorçalayıcı.
Aprelniñ 9-na qadar Qırımda 26 yañı koronavirus hastası qayd etildi. Olardan 20-si ketirildi, altısı üç qorantadan yerli ola. Yedi insan tüzelgen soñ yuqunç hastahanesinden çıqarıldı. Aqyarda beş koronavirus hastası aqqında haber etilgen edi, dördü tüzeldi. Aprelniñ 9-nda Aqyarda daa bir COVID-19 hastası aqqında bildirdiler. Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
