Qırımnıñ Rusiye sağlıq naziri İgor Çemodanovnıñ bildirgenine köre, işğal etilgen Qırımda koronavirus yuqunçınıñ tarqaluvı sebebinden 754 insan közetile. Bu aqta müessiseniñ matbuat hızmeti bildire.
«Al-azırda 754 insan dinamik közetüv altında buluna. 38 vatandaş statsionarda yata. 60 yaştan büyük 33 kişi közetile. Ekimler olarğa çoqça diqqat ayıra», – dedi Çemodanov koronavirus yuqunçınıñ tarqaluvına qarşı tedbirler ştabınıñ toplaşuvında.
Martnıñ 21-nde aqşam Qırımda ve Aqyarda 417 insan koronavirus sebebinden tibbiy nezaret altında qalğan edi.
Martnıñ 23-nde Qırımnıñ Rusiye akimiyeti yarımadada hastalanğan ilk insannıñ alı aqqında bildirdi.
Qırımdaki ve Aqyardaki Rospotrebnadzor idaresiniñ yolbaşçısı Natalya Penkovskayanıñ bildirgenine köre, yarımadada «koronavirus» diagnozı tasdıqlanğan Qırım sakininen alâqada olğan 37 insan tapıldı, olardan beşi yaqın tuvğanlarıdır. Olar tibbiy müessisede ya da evde tecrit etildi.
Koronavirusnen hastalanğan qırımlı Qırım ve Herson vilâyetiniñ memuriy sıñırındaki Rusiye keçiş noqtasından keçkende Frenkistanğa barğanını gizledi.
Berilgen malümatqa köre, Qırımda koronavirus hastasınen alâqada olğan bütün insanlar ve onı alıp ketken taksi aydavcısı belli ve tecrit etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.