Qırımnıñ Rusiye sağlıq naziri İgor Çemodanovnıñ bildirgenine köre, koronavirusnen hastalanğan birinci qırımlınıñ alı bir qarardır. Bu aqta o, martnıñ 23-nde koronavirus yuqunçınıñ tarqaluvına qarşı tedbirler ştabınıñ toplaşuvında ayttı.
«Diagnozı tasdıqlanğan hastanıñ alı yahşı. Sağlığı ve ayatı telükede degil», – dedi o.
Ştab toplaşuvında berilgen malümatqa köre, hastalanğan qırımlı işke bardı, şunıñ içün onıñnen alâqada olğan bütün hadimler tecrit etildi.
Qırımdaki ve Aqyardaki Rospotrebnadzor idaresiniñ yolbaşçısı Natalya Penkovskayanıñ bildirgenine köre, yarımadada «koronavirus» diagnozı tasdıqlanğan Qırım sakininen alâqada olğan 37 insan tapıldı, olardan beşi yaqın tuvğanlarıdır. Olar tibbiy müessisede ya da evde tecrit etildi.
Koronavirusnen hastalanğan qırımlı Qırım ve Herson vilâyetiniñ memuriy sıñırındaki Rusiye keçiş noqtasından keçkende Frenkistanğa barğanını gizledi.
Berilgen malümatqa köre, Qırımda koronavirus hastasınen alâqada olğan bütün insanlar ve onı alıp ketken taksi aydavcısı belli ve tecrit etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
