Kyiv salı künü, yanvarniñ 20-ne, keçer gecesi yañı Rusiye ücüminiñ eñ ağır aqibetlerine oğradı, dep bildirdi Ukrayina prezidenti Volodımır Zelenskıy. Onıñ aytqanına köre, tahminen altı biñ çoq daireli ev ışıqsız qaldı. Bazıları evelki ücümden soñ qızdıruv yaqında qaytarılğan kene zarar kördi, dep yaza Nastoyaşçeye Vremâ telekanalı (Amerikanıñ Sesi iştirakinen RFE/RL şirketi tarafından quruldı).
Daryanıñ dairesi aman-aman bir afta qızdırılmadı. Bu intervyü bazarertesi künü, yanvarniñ 19-nda, yazıldı. Çekim taqımı kelmezden bir saat ögüne evindeki batareyalarnıñ yarısı çalışıp başladı: "Bugün mında endi sıcaqça, bugün beş derecek. Tünevin mında eki derece edi". Amma salı künü ışıq ve qızdıruv kene ketti.
Ukrayina prezidenti ve Ukrayina istihbaratı azırlanğan daa bir darbe aqqında bildirgen ediler. Birinci patlavlardan soñ Kyivliler mağazlarğa ve metroğa ketti. "Aviatsiya çoq olsa ve raketalar planlaştırılsa, ketemiz. O vaqıt tüşemiz. Çünki raketalar evimizniñ yanına tüşken edi. Qasevetlenemiz", – dep tarif ete insanlar stantsiyadaki sığınaqta. "Pek sıq tüşmeymiz, amma bugün qorqtıq. Ballistika patladı ve çoq".
Gece Rusiye Ukrayinağa "Tsirkon" raketasını, 18 ballistik ve 15 qanatlı raketanı uçurdı. Ukrayina ava mudafaası çoqusını urıp tüşürdi. Ukrayina prezidenti Volodımır Zelenskıy bildirdi ki: olıp keçkenler – Rusiyeniñ barışıq teşebbüslerinden nefret etkeniniñ delilidir. Ve gece darbesiniñ aqibetleri daa beter ola bilir edi, amma Ukrayina ava mudafaasınıñ keri qaytaracaq imkânları bar edi, dep ayttı.
"Tamir brigadaları, bütün energetik şirketlerimiz, devlet müessiseleri, kommunal hızmetler vaziyetni stabilleştirmek içün gece-kündüz çalışacaqlar. Bütün diplomatlarımız, vekillerimiz Ukrayinanıñ ava mudafaası içün yeterli raketalar olsun dep, faal ve semereli çalışmalı. Keçenleri Ukrayinağa "Petriotlar" ve "Nasamslar" içün birer paket kirdi ve bu pek yardım etti. Bir kün bile keç qalsa ediler, darbe aqibetleri daa kritik olur edi", – dep ayttı prezident Zelenskıy.
Rusiyeniñ Kyivge qarşı dron ve raketa darbesiniñ aqibetleri, 2026 senesi yanvarniñ 20-si. Foto: Reuters
Esas darbe Kyivde kene issilik elektrostantsiyasına endirildi. Saba paytahtnıñ şeer yolbaşçısı Vitaliy Klıçko bir esabat berdi: 5,5 biñ çoq qatlı bina qızdıruvsız qaldı, aman-aman 80%-ı – soñki afta büyük emek sarf etip qızdıruv qaytarılğan evler. Tamir işlerini yapmaq içün elektrikçiler buzlağan topraqnı teşmege mecbur oldı.
"Bu kerçek qış. Topraqtan keçmege pek qıyın, daa zor. Amma bizim vazifemiz – işimizni yapıp, insanlarğa ışıq bermek", – dedi Klıçko.
Rusiye ücüminden soñ Kyiv ışıqsız, 2026 senesi yanvarniñ 20-si
Yüksek evlerde tulumbalar ışıqlarnen beraber söndürile. "Tulumbalar daimiy şekilde çalıştırıldı. Çünki ışıq söndürilüvi – tulumbalar söndürile ve pompalamay. Eki kiriş "bastırıldı". Üçüncisi – olmay, buzlağan. Sistemanı tökip, ekspretlerni celp etemiz", – dep tarif ete evlerden biriniñ idareci şirketiniñ reberi Mıkola Vâtrovıç.
"Yasno" energetik şirketiniñ baş müdiri yazğanına köre, paytaht meskenleriniñ yarısı ışıqsız qaldı. Kyivniñ sol yalısında em ışıq, em suv yoq.
Kyiv sakini Rusiyeniñ raketa darbesi sebebinden blackout vaqtında fener ışığında köpegini kezdire. 2026 senesi yanvarniñ 20-si
Darya da suvuqta qaldı. O, suvuq dairede yaşav layfhaklarını qullanıp baqa. Kyivde eñ populâr ve ucuzı – ateşke dayanğan tola, onı gaz ocağınıñ fırınında qızdıra.
"Böyle qızalar ve soñra qızdıruv berile. Anda quruycaq içtaban, köpek ayaqqabı qoymaq mümkün", – dep köstere Darya. Evde qalın urbada qalıp yuqlamağa mecburlar: "Qalın urba, eki çift çorap, yorğan. Karpatı yorğanı, sıcaq çay. Köpek yanıma yorğan altına köçti, çünki sıcaq".