ATR qırımtatar telekanalınıñ saibi Lenur İslâmov borclarnı qapatmaq ve yayınlarnı devam ettirmek içün Ukraina akimiyeti tarafından para yañıdan berilecek, dep bekley. Bu aqta İslâmov Qırım.Aqiqatqa tarif etti.
Ukraina Nazirler şurası bildirgenine köre, ATR içün belgilengen bücet parasınıñ bloku lâğu etildi.
«E, esnas ileriledi, kerçekten. Elbette, bu qıyın ve doquz ay devamında areketsiz qaldıq. Ğaye añlaşıla, amma insanlarğa aylıq bermek kerek, yayın parasını bermek kerek. ATR telekanalı – bir iş degil, şimdi bu – Putin ve Putinniñ Qırımda yapqanları ile küreştir. Vazifemiz – küreşni devam ettirmek, bu bizim informatsion cebemizdir. Ümüt etem ki, borclarımıznı qapatıp, daa raat bir rejimde yayınlarımıznı devam etip olurmız», – dedi İslâmov.
Telekanal saibi aytqanına köre, para berilmegende çoqusı hadimlerni qaldırıp oldı, amma, onıñ fikirince, «kollektiv eskisi kibi degil».
SEE ALSO: «ATRniñ vaziyeti Rusiye içün elverişli ola»«Qırımdan kelgen insanlar, 44 kişi, aman-aman episi qaldı. Bazıları daa stabil ukrain telekanallarına ketti, esas Ukrainadan çoq insanımız ketti – olar yayınnıñ tehnik tarafını temin etken edi. Mında qaramanlıq yapmağa yazılmağan insanlar ve biz olarnı coydıq. Amma biz gençlerni azırlap oldıq, bazı insanlarğa diger kütleviy haber vastalarında çalışmağa izin berdim, amma tele yayınlarında degil», – dep ayta İslâmov.
O, telekanalğa maddiy ve tehnik taraftan qol tutqan insanlarğa teşekkürler bildirdi.
«Esas Ukraina sakinlerinden 40 biñ dollar aldıq, Qırımdan da yardım ete ediler, bizge hızmet olaraq da yardım ettiler, yayın yapmağa imkân bergen ediler», – dep qayd etti telekanal saibi.
Fevralniñ 10-nda ATR qırımtatar telekanalı esapları blok etildi, dep bildirdi. Şu sebepten telekanal alıp barıcı ve musafirler olmağan yayınlarnen #SaveATR marafonını başlattı.
SEE ALSO: Qırımtatar faalleri: «ATRniñ qapatılmasına yol berilmemeli»O vaqıt Ukraina medeniyet, gençlik ve sport naziri olan Volodımır Borodânskıy ATR qırımtatar telekanalını qapatuv telükesi bar olğanını inkâr etti.
ATR Ukrainadan sürgün etilgen qırımtatarlar ve diger millet insanlarını yerleştirüv bücet programmasına köre 2016 senesinden berli devlet bücetinden maddiy yardım ala.
2015 senesi aprelniñ 1-nde ATR Rusiye litsenziyasını alamayıp, işğal etilgen Qırımda yayınlarını toqtattı. Yayınlar 2015 senesi iyünniñ 17-nde yañıdan başladı – telekanal Kyivge köçti.