Yalta blogeri ve jurnalisti Yevgeniy Gayvoronskiyniñ imaye tarafı onıñ Qırımdan quvulması ile bağlı mahkeme qararına şikâyet etecek.
Bunı Facebookta advokat Aleksey Ladin yazdı.
"Bugün Yalta şeer mahkemesi qarar cıqardı, oña köre Qırım blogeri ve jurnalisti Yevgeniy Gayvoronskiyni 2000 ruble cöremesini tölemeli ve Qırımdan çıqarılmalı. Qarar quvetini almağance, Evgeniy, Krasnodar ülkesinde yerleşken, Çetel vatandaşlarnıñ vaqtınca tutulğan merkezinde bulunacaq. Mahkeme qararına şikâyet etilecek", - haber etti advokat.
Dekabrniñ 20-sinde advokat Aleksey Ladin, Qırım.Aqiqat mühbirine tefsir bergende, ilhaq etilgen Qırımda Yalta blogeri ve jurnalisti Yevgeniy Gayvoronskiyniñ "Rusiye territoriyasından" sürgüni aqqında qararnı qabul etti, dep bildirdi.
Şimdilik ilhaq etilgen Qırımnıñ resmiy müessiselerinden bu malümatnıñ tasdıqı yoq.
Gayvoronskiyniñ sürgüni aqqında qarar
İlhaq etilgen Qırımda dekabrniñ 20-sinde bloger ve jurnalist Yevgeniy Gayvoronskiyni politsiyanıñ Massandra bölügine alıp kettiler. O, dekabr 20-sinde onıñ mahkemesi olmaq kerek, dep haber etken edi.
Oktâbrniñ 31-inde Gayvoronskiy içtimaiy ağlardaki Rusiye prezidenti Vladimir Putin aqqında yazı içün Rusiye Memuriy kodeksiniñ 20.1 maddesine köre qabaatladılar.
Yaltada Rusiye uquq qoruyıcıları martnıñ 6-nda «Primeçaniya» Aqyar neşiri ile iş tutqan jurnalist ve bloger Yevgeniy Gayvoronskiyniñ yaşağan yerini tintti. Bu aqta Rusiye tarafdarı cemaatçısı İlya Bolşedvorov Qırım.Aqiqatqa haber etti.
Yevgeniy Gayvoronskiy Donetskte dünyağa keldi, yerli aliy oquv yurtunıñ jurnalistika bölüginde oqudı ve şeerde jurnalist olıp çalıştı. Yaltada bir qaç yıl yaşay. Daa evel «Narodnoye yedinstvo» yerli Rusiye tarafdarı cemaat teşkilâtınıñ matbuat kâtibi olıp çalışqan edi. Onıñ faalleri 2014 senesi mart ayında yarımadanıñ Rusiyege qoşuluvı aqqında «referendum» keçirilmesi içün imza toplağan edi. Soñra Gayvoronskiy «Yevraziyskiy jurnal» Rusiye tarafdarı mecmuasınıñ muarriri oldı. Bu vazifede Yalta yalısında kösterilgen Rusiye prezidenti Vladimir Putinniñ er yılki beyanatı vaqtında onı maqtağan edi. Bir müddet Gayvoronskiy «Komsomolskaya pravda» Rusiye neşiriniñ Qırım muarririyetinde mühbir olıp çalıştı. İşten boşatılğan soñ ise yerli akimiyetni tenqit etkeni içün muhalifet dep adlandırılğan «Primeçaniya» Aqyar neşiri ile işbirligi yapmağa başladı. Bazı maqaleler içün jurnalist Yalta akimiyetini de raatsızlay. Ara-sıra onı şeer şurasınıñ sessiyasına yibermeyler.
2018 senesi fevral ayınıñ başında qırımlı jurnalist Yevgeniy Gayvoronskiy onı Yalta merkezinde köteklegenler, dep bildirgen edi. Onıñ aytqanına köre, o künü oquyıcı ile körüşip, şeer parkında olacaq tamir işlerini muzakere etecek edi. Jurnalist bu ücümni Yalta iş adamı Dmitriy Tükayev sımarladı, dep tüşüne. Gayvoronskiy onıñ «işine ve qanun bozuvlarına» bir qaç jurnalist tahqiqatını bağışlağan edi. Tükayev bu ikâyede onıñ adı keçkeni içün Gayvoronskiyge qarşı namus, itibar ve iş reputatsiyasını qorçalamaq içün dava açtırğanını bildirdi. Gayvoronskiy olıp keçken adiseni özü azırlağanında qabaatlandı.