Ukraina ombudsmanı Lüdmila Denisova Birleşken Milletlerni «silâ ve silâ parçalarını qanunsız aluv, berüv, satuv, saqlav ya da taşuvda» (Rusiye Ceza kodeksiniñ 222-nci maddesi) qabaatlanğan qırımtatar faali İlver Ametovnıñ davası boyunca Rusiyege qarşı basqı quvetleştirmesine çağırdı.
«Yarın vaqtınca işğal etilgen Qırımdaki sahte «Sudaq şeer mahkemesi» Sudaq regional meclisiniñ reisi İlver Ametovnıñ davasını baqıp başlaycaq. İlver evinde qırımtatar halqınıñ eski eserlerini ve antika silânı toplağanı içün işğalci akimiyet onı Rusiye Federatsiyası Ceza kodeksiniñ 222-nci maddesiniñ birinci qısmına istinaden (silâ ve silâ parçalarını qanunsız aluv, berüv, satuv, saqlav ya da taşuv) qabaatlay», – dep aytıla ombudsmannıñ Telegram haberinde.
SEE ALSO: Qırım.Aqiqat yañartılğan haber qullanımını taqdim eteOnıñ hatırlatqanına köre, iyülniñ 16-nda Rostov-na-Donu Cenübiy okrugınıñ arbiy mahkemesinde Aqmescitteki «Hizb ut-Tahrir davasınıñ» oturışuvı olacaq.
«İnsan aqları ve esas serbestliklerini qoruv şartnamesiniñ 6-ncı maddesinen kefil etilgen vatandaşlarımıznıñ imaye ve adaletli mahkeme, ana tilinde alıp barılğan mahkeme ve tahqiqatnıñ bütün malümatlarına irişüv aqqı temin etilsin dep, halqara monitoring missiyalarını, hususan BM Ukraina insan aqları monitoring missiyasını ve OSCE Mahsus monitoring missiyasını Rusiye Federatsiyasına qarşı basqı quvetleştirmelerine çağıram», – dep aytıla haberde.
Rusiye kontrolindeki Sudaq şeer mahkemesi qırımtatar faali İlver Ametovnıñ müzey kollektsiyasından alınğan eşyanen bağlı ballistik ekspertizanı tekrar yaptırmağa qarar bergen edi.
2019 senesi sentâbrniñ 27-nde Sudaqta Rusiye quvetçileri İlver Ametovnıñ evini tintti. Qırımtatar Milliy Meclisiniñ aza şeadetnamesi, müzey eşyaları, bazı vesiqalar «ekspertizağa» alındı.
Advokat Nazim Şeyhmambetovnıñ Qırım.Aqiqat mühbirine bildirgenine köre, Rusiye quvetçileri tintüvlerni Rusiye Ceza kodeksiniñ 280, 282 ve 238 maddelerine istinaden cinayetlerden şübhe bar olğanı içün «tahqiqattan evel teşkerüvi çerçivesinde» keçirdi.
Qırım Muhtar Cumhuriyetiniñ prokuraturası İlver Ametovğa ait binalarda keçirilgen «qanunsız tintüvler» sebebinden cinaiy tahqiqat başlattı.
Bu sene mayıs ayında berilgen malümatqa köre, Kreml kontrolindeki Sudaqnıñ Mirovoy mahkemesi İlver Ametovğa 150 biñ ruble para cezasını bermege qarar aldı. Para cezası onıñ iş adamı olaraq köstergen faaliyetinen bağlıdır.