Rusiye kontrolindeki Sudaq şeer mahkemesi qırımtatar faali İlver Ametovnıñ müzey kollektsiyasından alınğan eşyanen bağlı ballistik ekspertizanı tekrar yaptırmağa qarar berdi. Bu aqta advokat Aleksey Rostovtsev mahkeme oturışuvından soñ Qırım.Aqiqat mühbirine bildirdi.
Onıñ aytqanına köre, prokuror «müim olmağan bozuvlarnı» yoq etmek içün ilâve ekspertizanı keçirmege istedi, advokat ise cinaiy davadaki eki ekspertizanı uyğun körmeyip, tekrar yapılmasında israr etti. Advokat, çıqarğan hulâsaları qıyın tehnik esaplamalarınen bağlı, dep ayttı. Olardan añlaşıla ki, kriminalistler tam olaraq añlaşılmağan usullarnen cinayet içün kerek olğan küçke irişti.
Qadı Yelena Bosi taraflarnıñ fikirlerini diñlep, mahkeme-ballistik ekspertizası tolusınen tekrar yapılmalı, dep qarar çıqardı.
Kriminalistler qayd etilgen şübhelerni red etip, İlver Ametovnıñ müzey kollektsiyasından alınğan Ekinci cian cenki karabini silâ parçası olamı cevap bermeli.
Bu ekspertiza bitkenine qadar mahkeme esnasında teneffüs ilân etildi.
2019 senesi sentâbrniñ 27-nde Sudaqta Rusiye quvetçileri İlver Ametovnıñ evini tintti. Qırımtatar Milliy Meclisiniñ aza şeadetnamesi, müzey eşyaları, bazı vesiqalar «ekspertizağa» alındı.
Qırım Muhtar Cumhuriyetiniñ prokuraturası İlver Ametovğa ait binalarda keçirilgen «qanunsız tintüvler» sebebinden cinaiy tahqiqat başlattı.
Advokat Nazim Şeyhmambetovnıñ Qırım.Aqiqat mühbirine bildirgenine köre, Rusiye quvetçileri tintüvlerni Rusiye Ceza kodeksiniñ 280, 282 ve 238 maddelerine istinaden cinayetlerden şübhe bar olğanı içün «tahqiqattan evel teşkerüvi çerçivesinde» keçirdi.
Bu sene mayıs ayında berilgen malümatqa köre, Kreml kontrolindeki Sudaqnıñ Mirovoy mahkemesi İlver Ametovğa 150 biñ ruble para cezasını bermege qarar aldı. Para cezası onıñ iş adamı olaraq köstergen faaliyetinen bağlıdır.
