Anğara köyündeki «gaz borusında diversiya» davasınıñ mabüsi Asan Ahtemovnıñ ömür arqadaşı Repika aqayını Aqmescit SİZOsında ilk sefer ziyaret etti. Bu aqta o, Facebookta bildirdi.
«Asannen birinci kere SİZOda körüştim. Pek eyecanlı ve qıyın bir kün oldı. Bir qaç saat beklegen soñ meni, niayet, körüşüv odasına kirsetkenler. Qızdırılmağan, yerge qoyulğan demir stullı kirli bir oda, telefonlar. Menim Asannen arasında eki qatlı tozlu, kirli cam ve parmaqlıq bar edi. Amma buña baqmadan, sevimli aqayımnı körgenim içün pek bahtlı edim. Yahşı körüne – saçı qırqıldı, tıraş oldı. Sağlıq vaziyeti bir qarar, diqqatlı olmağa tırışa. Avalar suvuğanınen kamera da suvuq oldı, sıcaq urbada ve şapkada yuqlay. Ruhtan tüşmey, dayana. Tezden er şey biter, dep ümüt ete ve işana», – dep yazdı Repika Ahtemova.
Onıñ aytqanına köre, Asan Ahtemov «bizge ve oña qoltutıp yardım etken er keske teşekkürler bildirdi».
«Men de aqayımnıñ sözlerine qoşulıp, tuvğanlarımız, dostlarımız, tanışlarımız ve lâqayt qalmağa insanlarğa qoltutuv ve yardım içün teşekkürler bildirmege isteyim. Siz olmasañız, pek qıyın olur edi», – dep bildirdi Repika.
2021 senesi noyabr ayında Rusiye FSBsi «gaz borusındaki diversiya davasınıñ» mabüsi Asan Ahtemovnı patlayıcı maddelerniñ qaçaqçılığında da qabaatladı.
Advokatnıñ bildirgenine köre, Asan Ahtemovğa qarşı qabaatlavğa «teşkilâtlanğan gruppa kerçekleştirgen diversiya» (Rusiye Ceza kodeksiniñ 281-inci maddesiniñ 2-nci qısmı, «a» noqtası) ve «şahıslar gruppası tarafından patlayıcı madde ya da patlayıcı cihazlarnı qanunsız aluv, berüv, satuv, saqlav, taşuv, yollav ya da yanında taşuv» (Rusiye Ceza kodeksiniñ 222.1 maddesiniñ 4-ünci) ilâve etildi. Azamatov bunı «ilk itiraf şaatlığından vazgeçkeni içün FSBniñ intiqamı» dep adlandırdı.
Ağa-qardaş Asan ve Aziz Ahtemovlar eñ az 2022 senesi yanvarniñ 23-ne qadar SİZOda qalacaqlar.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.