Rusiye kontrolindeki Qırım Yuqarı mahkemesi advokat Edem Semedlâyevniñ polis hadiminiñ talabınen soyunmağa razı olmağanı içün berilgen memuriy para cezasına qarşı Qırımnıñ advokatlar palatasından 75-ten çoq uquqçı tarafından imzalanğan istinaf şikâyetini red etti. Bu aqta «Qırım birdemligi» cemaat birleşmesi Qırım.Aqiqatqa bildirdi.
«İmaye şikâyetinde «Polis aqqında» Federal qanunnıñ 5-inci maddesiniñ 3-ünci qısmına esaslandı, oña köre, içki kiyimni baquv talabı istisnaiy ola ve dava malümatında böyle bir sebep yoq. Advokatlar mahkemege baquv talabı, protokolnı tizgen Aqmescitteki «E» merkeziniñ yolbaşçısı Ruslan Şambazovnıñ fikirince, uquqçıda ola bilecek ekstremist tatunen bağlı edi, dep ayttı. Uquqçılar qanun bedende böyle resimler olmasını yasaqlamay, amma olarnı açıq köstermege yasaq ola, dep qayd etti, şunıñ içün polis hadiminiñ talabı qanunsız edi», – dep aytıla haberde.
Mahkemede Semedlâyevni temsil etken advokat Konstantin Manakov qadı Vladimir Aginniñ qararı telükeli bir emsal yapa, dep qayd etti, «çünki er bir advokatnı farqlı sebeplerden içki kiyimini köstermege mecbur ete bileler».
Advokatlar protokol tizilüvinde protsessual hatalar ve «ğayrıdan yazıluvda» şübheli şeyler oldı, dep qayd etti. Birincisi 2021 senesi oktâbrniñ 25-nde tizildi, aynısı 2021 senesi noyabrniñ 11-nde «E» Merkeziniñ hadimi Ruslan Şambazov tarafından bitirildi.
«Qadın Vladimir Agin, birinci qurulış mahkemesiniñ «para cezası qararını lâğu etmek içün müim degil edi», polis hadiminiñ protokolı ise «Semedlâyevniñ qabaatını isbatlaycaq delil» ola, dep saydı. Böylece, Merkeziy rayon mahkemesi deñişmedi», – dep aytıla haberde.
Noyabrniñ 18-nde Rusiye nazaretinde olğan Qırımnıñ Yuqarı mahkemesi Edem Semedlâyevniñ tevqif etilmesine berilgen istinaf şikâyetini red etti.
Noyabrniñ 11-nde Rusiye kontrolindeki Aqmescitniñ Kiyev rayon mahkemesi advokat Edem Semedlâyevni 12 künge apiske aldı ve Ekstremizm ile küreş merkeziniñ hadimlerinden biriniñ ögünde soyunmaqtan red etkeni içün 4 biñ ruble para cezasını berdi.
ABD OSCE missiyası Qırımda mustaqil advokatlarğa qarşı taqip siyasetini toqtatmağa çağırdı. Büyük Britaniya ve Çeh Cumhuriyeti Ukraina elçihaneleri Semedlâyevniñ apiske alınuvını takbih etti. Ukraina Tış işler nazirligi Edem Semedlâyevniñ apiske alınğanını «zenaat aqlarınıñ bozuluvı» ve «basqı» dep adlandırdı.