Rusiye kontrolindeki Qırım Yuqarı mahkemesi Qırımda «silâ ve patlayıcı maddelerni taşığanında ve saqlağanında» qabaatlanğan qırımtatar faali Edem Bekirovğa çıqarılğan ğıyabiy qararğa qarşı imayeniñ istinaf şikâyetini qanaatlendirmedi.
Bu aqta Qırım.Aqiqat mühbiri advokat Aleksey Ladinniñ malümatına esaslanıp haber ete.
Advokatnıñ bildirgenine köre, oturışuv bir saattan az devam etti ve neticede mahkeme birinci instantsiya mahkemesiniñ qararını deñiştirmemege qarar aldı.
Rusiye kontrolindeki Aqmescit mahkemesi 2021 senesi iyün ayında Edem Bekirovnı 7 yıl apis cezasına ve 150 biñ para cezasına üküm etti. Bekirov, bu üküm «halqnı qorquzmaq» içün çıqarıldı, dep qayd etti.
Ukraina Yuqarı Radasınıñ insan aqları vekâletlisi Lüdmila Denisova Bekirovğa çıqarılğan ükümni takbih etip, halqara toplulıqnı «Rusiyege basqı yapmağa» devam etmesine çağırdı.
Edem Bekirov davası
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.